KENNERSRAAD

Oorweeg jy ’n vloer van saamgestelde hout in jou badkamer? Etienne Louw van KBAC Flooring sê wat jy in gedagte moet hou:

“Ons sou nie normaalweg ’n vloer van saamgestelde hout in ’n badkameromgewing aanbeveel nie, maar in dié geval (oorkant) het die kliënt én argitek dit vir die hele projek gespesifiseer. Danksy die oopplan-ontwerp van die badkamer en voldoende ventilasie was die kanse skraal dat dit nie sou slaag nie.

“As jy ’n houtvoorkoms in jou badkamer wil hê, beveel ons liewer luukse vinielteëls (LVT) of ’n waterbestande gelamineerde vloer aan. Dié materiale vaar heelwat beter as saamgestelde hout in so ’n omgewing.”

Die vloer in dié huis lyk nog pragtig. “Dit het ons stoutste verwagtings oortref,” sê die huiseienaar, Ancois Basson. “Ons het dit ook in die kombuis laat lê, waar ons heelwat meer water mors as in die badkamer. En dit werk uitstekend!”