Gestopte lamsboud en goue aartappels

Die idee om die lamsboud se heup- en boudbeen te verwyder terwyl die skenkelbeen ewe mooi sy vorm behou, kom uit Jamie Oliver se nuwe resepteboek Jamie Cooks Italy. Genoeg vir 8–10 Bereidingstyd: 1 uur Gaarmaaktyd: 1 uur 30 minute Oondtemperatuur: 200°C

• 1 groot lamsboud (sowat 2,25kg), heup- en boudbeen verwyder • 2kg mediumgroot aartappels, geskil • sowat 30ml worcestersous • 30ml olyfolie • 2 heel knoffelbolle, middeldeur gesny • olie vir diepbraai • 80g vars mentblaartjies, goed afgespoel en drooggemaak • klaar bereide mentsous VULSEL

• 125ml droë broodkrummels • 125ml platblaarpietersielie, fyngekap • 125ml vars basilie, fyngekap • 60ml vars mentblare, fyngekap • ’n takkie roosmaryn, blaartjies gestroop en fyngekap • 6 ansjovisfilette, fyngekap • 60ml gerasperde parmesaankaas • sowat 30ml suurlemoensap

1 Meng al die vulselbestanddele en hou eenkant.

2 Vlek met ’n skerp mes versigtig die ontbeende deel van die lamsboud oop en versprei die vulsel eweredig daaroor. Rol op en bind met kombuistou vas in ’n mooi vorm, en sit dit in ’n groot oondroosterpan.

3 Voorverhit die oond. Kook die aartappels vir 5 minute in soutwater, dreineer en rangskik rondom die lam. Sprinkel die worcestersous en olyfolie oraloor en geur met sout en peper na smaak. Bak nou die lam en aartappels vir 1 uur.

4 Haal uit die oond en skep die aartappels uit. Bedruip die lam, sit die knoffel by en bak vir nog 15 minute of tot so gaar soos jy daarvan hou. Laat die vleis goed rus voor dit gesny word. Die lam is nou pienk en sappig. (As jy jou lam goed gaar verkies, kan jy dit vir 10–12 uur of oornag in ’n baksakkie in die oond teen 100 °C bak totdat die vleis spreekwoordelik van die been afval.)

5 Krap die aartappels met ’n vurk en diepbraai in warm olie tot goudbruin en ekstra bros. Nadat die aartappels gebraai is, diepbraai ook die mentblare versigtig vir ’n paar sekondes tot glansend, deursigtig en bros. Dié garnering lyk vars en gee ’n heerlike tekstuur. Sit die sappige lamsboud, knoffel en aartappels met die bros blaartjies en mentsous voor.

Wenk As jy die aartappels die dag voor die tyd wil kook en krap, en net voor julle aansit wil diepbraai, maak dit weer warm voor hulle olie toe gaan vir die beste resultate. Geroosterdegroente-slaai Rooster 12 gehalveerde geel murgpampoentjies en 12 gehalveerde babaworteltjies op ’n riffelpan totdat mooi lyntjies vorm. Voeg 125 ml geroosterde soetrissierepies en hul roostersouse by en geur met sout, peper en ’n skeut goeie olyfolie. Skep op ’n bed babablare en sprinkel geroosterde pekanneute en bosbessies oor. Die olyfolie en soetrissiesappe maak ’n lieflike sousie. >>