Rugby-foefies
Só oefen en sweet die Stryders agter die skerms op die rugbyveld.
Weekdae kykNET (*144) 18:30
Wanneer Blitz ( Werner Coetser), Denver (Vaughn Lucas), Simon (David Louw) en ander lede van die Stryders-span op die veld uitdraf, lyk hulle soos gesoute rugbyspelers. Die manne weet presies hoe om te skop, te verdedig en al die bewegings van die lynstane tot skrums eksieperfeksie uit te voer. Al lyk dit op die oog af vir die kykers of rugby speel tweede natuur is, kry die akteurs en regisseurs insette van professionele spelers en oefen gereeld om die aksie soos die ware Jakob te laat lyk.
OEFENVELD EN REGTE SPELERS
Om akteur te wees en jou woorde te ken is een ding, maar om jou lyf ’n kranige rugbyspeler te hou sit beslis nie in elke akteur se broek nie. In die sepie speel talle tonele op die rugbyveld af tydens oefensessies of wanneer die Stryders met ander spanne kragte meet. Dis immers ’n rugbysepie!
Overberg Produksies, die vervaardiger van die sepie, probeer die rugbytonele en wedstryde sover moontlik eg hou. “Die rugbytonele word by die Diggers-rugbyklub in Johannesburg verfilm. Van die rugbyspelers wat saam met die akteurs op die veld te sien is, is regte rugbyspelers en lede van Diggers of die Tshwane Universiteit van Tegnologie (TUT) in Johannesburg se eerstespanne,” vertel Rudo van Heerden, bestuurder van Openbare Betrekkinge en Fasiliteite by Overberg Produksies. Ekstras van verskillende rugbyklubs word ook as spelers en toeskouers ingespan. Wanneer ’n belangrike wedstryd in die storielyn
KENNERS EN BESERINGS
Maar al die bewegings gebeur nie sommer spontaan voor die kamera nie. Die regisseurs kry raad by rugbykenners. “Ongelukkig kan ons nie die kenners se name bekendmaak nie, want dis streng vertroulik,” sê Rudo.
Die pompon-meisies moet nes die rugby-akteurs gereeld oefen en voer hul danspassies gemiddeld een keer per week uit wanneer die Stryders op die veld is. Beserings is by enige taai rugbywedstryd algemeen, maar Rudo sê daar’s tydens die verfilming van hierdie tonele geen harde kontak tussen die spelers nie. “’n Paar lede van die produksiespan is darem opgelei in noodhulp as iemand beseer word,” voeg hy by.
WAT DIE AKTEURS SÊ
Werner Coetser, wat die Stryders se blitsige losskakel Blitz speel, sê die grootste uitdaging op die rugbyveld is om voortdurend gefokus te bly. “Die moeilikste aksies is die skoppe na die pale. Glo my, dit lyk makliker as wat dit werklik is. Sedert ek in Getroud Met Rugby speel, het ek sommer tien keer meer respek vir skoppers gekry,” sê Werner.
David Louw, wat die flank Simon speel, sê hy is in sy element op die rugbyveld want hy het op skool rugby gespeel. Vaughn Lucas, oftewel die agtsteman Denver, vertel hy moet baie konsentreer tydens opnames. “Die losgemaal bly vir my die moeilikste omdat ons versigtig is om mekaar nie te beseer nie, maar terselfdertyd moet ons dit na regte rugby op die veld laat lyk.”