Meneer doen-dit-als
Daar’s geen einde aan Beer Adriaanse se talente nie.
Seisoen 1 Maandae kykNET (*144) 20:30
Beer Adriaanse (31) is nie net akteur nie, hy is ook ’n skrywer, musikant en regisseur. “Ek reken wanneer jy gebore word, kry jy toegang tot ’n reuse-buffet en ek wil alles proe – selfs die sjef se spesiale sous wat sy net vir gereelde klante onder die toonbank hou,” sê Beer. En hou ’n mens die talentvolle man dop, is hy besig om ’n fynproewer op vele terreine te word.
NINJA OF RUIMTEVAARDER
Sy naam is eintlik Jacobus, maar hy het reeds op skool die bynaam Beer gekry. “Ek was in Paul Roos Gimnasium in Stellenbosch en omtrent almal in die koshuis het byname gekry. Ek het so ’n jaar daarteen baklei, maar later besef Beer is een van die minder wrede byname,” vertel hy. Hy beskryf sy kinderjare as baie bevoorreg. “My ouers het my en my twee broers, Jaco (29) en Johann (26), oopkop grootgemaak en aangemoedig om baie te lees en ons eie menings oor dinge te vorm.”
Beer wou aanvanklik ’n ninja word, toe ’n ruimtevaarder. “Maar op twaalf het ek my heelhartig deur my punkorkes Dropout Monks in musiek begewe. Ek blameer vir Kurt Cobain,” sê hy met verwysing na die ikoniese hoofsanger van die rockgroep Nirvana.
SIELKUNDE EN KOMEDIE
Die verbeeldingryke Beer het teen baie mense se verwagtinge in nie ná matriek die wêreld met ’n rugsak gaan verken nie, maar ’n BA-graad in sielkunde aan Maties behaal. Daarna het hy sy honneursstudies in joernalistiek voltooi. Vandag kom die sielkunde-opleiding hom nuttig te pas. Beer, wat onder meer die komediereeks Buurtwag (kykNET, 2015) geskryf het, sê: “Soveel karakters, soveel stemme, soveel probleme. Ek wens soms my karakters kan my betaal wat sielkundiges betaal word!”
Daar’s ’n goeie rede hoekom hy meestal komedie skryf. “Komedie is die lens waardeur ek die wêreld sien. Selfs al probeer ek melodrama skryf, kom dit ten beste tragikomies uit. Ek kan baie min dinge ernstig opneem,” bieg hy.
SKRYFWERK EN MUSIEK
Die ink vloei dik deur sy are. Sy ma, Wilna Adriaanse, is ’n gesoute romanskrywer (Dubbelspel, 2014). “Die feit dat ek van jongs af kon sien wat dit verg om te skryf, het baie gehelp. Boude-opstoel en toewyding,” sug hy. Ma Wilna sowel as die res van sy gesin skroom nie om hul opinie oor sy pennevrug te lug