Twee nuwe komedies op kykNET
Lekker lagreekse is op pad!
Ek is mal oor Hotel op kykNET. Kan ons nog enige nuwe komedies op die kanaal verwag, tvplus? – ESTELLE VAN DER MERWE, BENONI
Goeie nuus vir alle liefhebbers van lagreekse – kykNET is besig met die voorproduksie van twee nuwe komediereekse: Elke Skewe Pot en Tot Tyd En Wyl. Elke Skewe Pot gaan oor vier vroue uit uiteenlopende wêrelde wat vir ’n aanlyn opsitkersdiens, Elke Skewe Pot, werk en pasmaats vir ander mense vind, maar die liefde bly hulle ontwyk. Verfilming begin in Oktober en die rolverdeling is nog nie vasgestel nie. Henriëtta Gryffenberg, Anne Hirsch, Joshua Rous en Meren Reddy is die skrywers, en dit word deur Rous House Productions vervaardig wat ook High Rollers (2013-nou) en Geraamtes In Die Kas (2013) op hul kerfstok het.
In Tot Tyd En Wyl gaan bekende akteurs soos Anrich Herbst, Anel Alexander, Pierre Breytenbach, Lindie Stander, Dirk Stoltz, Ruan Wessels en Ramey Short die lagspiere kielie. Die reeks kom uit die pen van Geoff Newton, skrywer van treffer-aksiereekse soos Snitch 1 en 2 (2004 en 2007) en Innocent Times (2008), en Mitzi Booysen (mede-vervaardiger van Binnelanders, 2005-nou, en voorheen hoofskrywer van Binnelanders). Dit gaan oor Louise (Lorraine Burger), ’n hoofskrywer van ’n sepie, wat besef die lewe is besig om deur haar vingers te glip terwyl sy uitsonderlike lewens vir haar sepiekarakters skep. Gert van Niekerk is die regisseur en dit sal in Januarie 2017 uitgesaai word.