Tau se doodskoot?
Sy wêreld tuimel inmekaar wanneer Karabo wil skei.
Weekdae SABC1 (*191) 20:00
Die Moroka-familie is bekend vir drama en niks is so dramaties soos ’n sepie-egskeiding nie. Karabo Moroka (Connie Ferguson) en haar man, Tau (Rapulana Seiphemo), het goeie en slegte tye beleef, maar die keer “is dit beslis verby”, sê Generations – The Legacy se publisiteitsbeampte, Gaaratwe Mokhethi. Moenie nou enige gewelddadige konfrontasies verwag nie, want Karabo is nog in Londen.
DIE BEGIN VAN DIE EINDE
Wanneer oom Tebogo (Joe Mafela) Tau op Dinsdag 27 Desember besoek, is die laaste ding wat Tau verwag, nuus van sy vervreemde vrou. Sy het ná maande van stilte haar familieraadgewer gevra om hul egskeiding te hanteer. “Tau wou altyd ’n gelukkige einde saam met Karabo hê. Hy’s lief vir haar en het gedink hulle sou hul probleme kan oplos,” verduidelik Gaaratwe. “Hy is verpletter wanneer Karabo sy sprokiesdroom wegraap.”
Karabo is in Augustus 2016 uit SuidAfrika weg om weer kalmte in haar lewe te kry. “Ná Amo (Noluthando Nxumalo) se geboorte middel-2015 het Karabo gedink sy het aan nageboorte-de- pressie gely,” sê Gaaratwe, en voeg by: “Karabo het besef die ontevredenheid in haar lewe was oor haar huwelik.” Toe Amo in Augustus 2016 teruggegee is, byna ’n jaar nadat Karabo se eks-swaer en skoonsuster Gadaffi en Tshidi ( Vuyo Dabula en Letoya Makhene) haar omgeruil en ontvoer het, was dit te veel vir Karabo en sy het SA verlaat.
FAMILIESAKE
Tau is nie die enigste een wat nie wil skei nie – oom Tebogo wil hê sy niggie moet haar eise hersien, maar Gaaratwe sê: “Karabo is koppig en as sy eers ’n besluit geneem het, bly sy daarby.” Tau is hartseer. “Hy het die Morokafamiliebesigheid help bou en het bygedra om die familietrust se koffers te vul.” Tau gaan sy lot nie sonder ’n geveg aanvaar nie, maar is hy gereed vir oorlog? Want Karabo is berug vir haar vurigheid. • Connie en Rapulana het hul tonele geskiet en was nie beskikbaar vir onderhoude nie.