Boereoorlog herleef
PG du Plessis se meesterstuk Fees Van Die Ongenooides word nou op gratis TV uitgesaai.
Dinsdae SABC2 (*192) 20:00 (vanaf Dinsdag 3 Januarie)
Fees Van Die Ongenooides, ’n aangrypende minireeks oor die Anglo- Boereoorlog (1899-1902) uit die pen van die bekroonde skrywer PG du Plessis, word nou vir die eerste keer op gratis TV (SABC2) uitgesaai. “Ek is verheug dat Fees Van Die Ongenooides weer uitgesaai word,” sê die reeks se regisseur, Katinka Heyns. “Mense is steeds onkundig oor die Boereoorlog en dié verhaal sal hulle ’n ander perspektief gee.”
Die reeks speel oor drie tydperke af en handel oor die verskrikking van die oorlog en hoe mense vandag nog met die letsels daarvan leef, soos gesien deur die oë van die verteller. “PG stel baie in die Anglo- Boereoorlog belang en het intensiewe navorsing daaroor gedoen,” vertel Katinka. En net soos PG se gelyknamige roman van 2009 is die TV-reeks groot lof toegeswaai. Dis oorspronklik in Engels as Feast Of The Uninvited (M- Net, 2008) vervaardig om dit internasionaal te bemark, later in Afrikaans oorgeklank en in 2014 op kykNET uitgesaai.
Benewens die lang en uitgerekte oorklankingsproses was die verfilming ook nie sonder slaggate nie.
TERUGSLAE EN BITTER KOUE
Die reeks is in die hartjie van die winter geskiet en die koue het sy tol geëis, sê Katinka. “Dit was bitter koud en die dae was kort,” vertel sy. Die meeste van die tonele is in Standerton, Mpumalanga, geskiet. Baie tonele is ook op oudpresident M.T. Steyn, die laaste president van die onafhanklike Oranje-Vrystaat (1896-1902), se plaas Onze Rust, naby Bloemfontein, verfilm. En toe gebeur die onvoorsiene: “As gevolg van spesiale effekte tydens die herskepping van veldslagtonele het daar ’n brand op Onze Rust uitgebreek,” sê Katinka.
Maar dit was nie al terugslag nie. Kort daarna het Marius Weyers, wat die rol van Danie van Wyk speel, se perd weens perdesiekte gevrek. “Dit was ’n kampioenhings en ons moes blitsvinnig ’n ander een in die hande kry. Die helfte van Marius se tonele was toe reeds verfilm,” vertel Katinka. Gelukkig kon die produksiespan ’n plaasvervangerperd vir Marius kry. “Periodestukke is meer gekompliseerd vanweë faktore soos perde en soldate. Boonop het ons ’n knap begroting en min tyd gehad – ons het 6 episodes binne 10 weke verfilm,” voeg Katinka by.
KOSTUUMS EN REKWISIETE
Om kostuums soos kappies, sisrokke, onderbaadjies en kakieklere, wat die mans en vroue tydens die oorlog gedra het, in die hande te kry was ’n reusetaak. Die rekwisiete en vervoermiddels uit toeka se dae was ook nie maklik verkrygbaar nie. “Die kostumier Diana Cilliers het al die kostuums by haar werkwinkel in Kaapstad gemaak en die rekwisiete soos die tente, gewere en waens is van oral oor en van museums verkry,” verduidelik Katinka. “Baie van die rekwisiete is ook nageboots en vervaardig.”
Almal in die omgewing was baie behulpsaam en tegemoetkomend – en opgewonde oor die groot reeks. “Die inwoners van Standerton het ons op die hande gedra. Ek weet nie wat ons sonder advokaat Theunie Steyn en sy oorlede vrou, Yvonne, die destydse eienaars van Onze Rust, sou doen nie. Hy is self ’n deskundige op oorlogsgebied. Ons moes loopgrawe op hul plaas grawe, en Theunie het ook ’n rolletjie gespeel,” vertel Katinka.