Slim syfers
Met die hernuwingseisoen in volle gang oorsee, verduidelik ons hoekom programme hernu of gekanselleer word.
Onthou jy nog hoe jou wiskunde-onnie gesê het “jy gaan hierdie somme in die lewe nodig kry”? As jy by die opdraggewende aspek van die TV-bedryf betrokke is, het jou onderwyser nie gejok nie. Maar gelukkig is algebra of trigonometrie nie ter sprake wanneer besluit word of ’n TV-program nog ’n seisoen of die valbyl kry nie. “Dis basiese somme – as die syfers reg is, kry die program nog ’n seisoen, Indien nie, wel . . .” verduidelik Ziyanda Mngomezulu, e.tv se hoof van plaaslike produksies.
SPANBESLUIT
“Dis nie net een persoon wat die besluite neem nie,” voeg Ziyanda by. “Ons het ’n hersieningsproses tydens en ná die seisoen sodra ons al die data het.” Dit sluit in gehoornasporing, die kykerreaksie op sosiale media, sowel as die inkomstestroom. “Die bemarkings-, produksie- en publisiteitspanne hou ’n paneelvergadering en lewer insette, en dan word die somme gemaak,” vertel Ziyanda. “As dit op papier uitwerk, lê ons dit aan die bestuurshoofde voor.”
Zandile Nkonyeni, die publisiteitshoof vir al die SABC-kanale, voeg by die SABC gee opdrag vir inhoud in die verskillende genres van ’n verskeidenheid vervaardigers en verspreiders. “’n Drama soos Thula’s Vine (2017-nou) is vervaardig vir SABC3 gegrond op die kanaal se strategiese behoeftes,” sê Zandile. Die openbare uitsaaier kry kyksyfers ná die seisoen geëindig het, en dan begin die hersieningsproses. Daarna is dit die senutergende gewag – Thula’s Vine, wat in Junie geëindig het, moet nog hoor of dit hernu word.
WENRESEP
Daar is ’n goeie rede hoekom programme soos Survivor (2000-nou) en The Amazing Race (2002-nou, meer op bl. 30) al onderskeidelik by hul seisoen 35 en 29 trek. “Survivor het die standaard gestel vir programme sonder ’n draaiboek,” sê die skepper en uitvoerende vervaardiger, Mark Burnett. “Ons het nooit wegbeweeg van die kernwaardes nie, maar ons hou die program vars en dit lok die kykers terug.”
Mark voeg by: “Toe Survivor begin het, was die gemiddelde kykertal 28,3 miljoen per seisoen, maar deesdae se syfer (10,32 miljoen) is sowat ’n derde daarvan . . .” Hoekom word dit dus vir 2 seisoene op ’n keer hernu? “Ons het hier en daar ’n slegte seisoen gehad, maar ons kom altyd terug met iets beters,” sê die aanbieder,
Jeff Probst. Amazing Race se aanbieder, Phil Keoghan, voeg by “die kykers is lojaal. Die kerngehoor bly kyk en ons pas aan by vooruitgang in die wêreld – soos om die sosiale media in seisoen 25 in te span.”
Stabiliteit en voorspelbaarheid is ook ’n faktor. Toe SABC3 Days Of Our Lives (1965-nou, sien ble. 20-21) na ’n 22:00-tydgleuf geskuif het, het die kykertal gekrimp. “Om programroosters rond te skommel, tesame met die feit dat baie min of geen inligting vooraf daaroor gegee word, kan ’n treffer binne ’n halwe seisoen in ’n flop verander,” sê ’n bron binne die bedryf.
MAKLIKE SOMME
Game Of Thrones (2011-nou) was in die kol vir die netwerk HBO met sy seisoen 7, wat rekordsyfers vir elke episode opgestel het, hoewel die seisoen korter is. Selfs die 2 episodes wat vooraf gelek is, het ’n toename in wettige kykers gehad. Die trefferreeks het na berig word vir HBO meer as $1 biljoen (R14 biljoen) per jaar met verkope verdien. As in gedagte gehou word die produksiekoste per seisoen is $420 miljoen, is die som maklik: maak meer! Daarteenoor is verwag Twin Peaks (1990-2017) sou ’n groot gehoor van miljoene met sy nuwe weergawe (seisoen 3) lok, maar dit kon skaars 500 000 mense per episode laat kyk.
“Soos ek gesê het, partykeer is die som maklik,” lag Ziyanda.