Kruie kraai koning
Die aktrise Antoinette Pienaar hou haar lyf bossiedokter.
Kruidjie Roer My Dokumentêr Woensdag 13 September VIA (*147) 19:30
Die aktrise en sangeres Antoinette Pienaar (56) was in 2001 ernstig siek aan malaria ná ’n besoek aan Mali in Wes-Afrika, en sy kon dit net nie afgeskud kry nie. Sy het alles probeer maar niks het gehelp nie – tot dit uiteindelik die kruie- ghoeroe van die Karoo, oom Johannes Willemse (96), was wat haar gesond gekry het. Antoinette, veral bekend vir haar verhoogstukke oor historiese figure soos Krotoa van die Kaap, het dadelik alles laat staan en meer by oom Johannes op die plaas Theefontein, in die omgewing van Beaufort-Wes, gaan leer. Vandag is sy self ’n “kruiegeneesheer”, en die dokumentêre program Kruidjie Roer My (2017) vertel haar en oom Johannes se storie.
RAAD VIR ELKE KWAAL
In die dokumentêre program van 60 minute sien kykers hoe Antoinette oom Johannes se wysheid gebruik om ander te help. Elke weekaand tussen 5 en 7 is sy beskikbaar vir telefoonkonsultasies, en mense bel van oral in vir raad oor allerlei kwale – van siektes tot emosionele probleme. Die landlyn is die enigste manier waarop ’n mens met Antoinette kontak kan maak op die plaas, waar hulle so min moontlik impak op die omgewing probeer maak. “Ek leef heeltemal van die radar af,’” sê sy laggend, en vertel hoe hulle geen munisipale krag gebruik nie, en van sonkrag afhanklik is vir hul elektrisiteit.
MINDER IS MEER
Van TV kyk, die internet en sosiale media weet Antoinette niks nie. Sy maak selde kontak met die buitewêreld. “Ek gesels wel elke Dinsdagmiddag om 16:30 met Amore Bekker van Tjailatyd [op RSG 100-104 FM] oor Karoostories, kruie en geneesmiddels.”
In die sestien jaar wat Antoinette al op Theefontein bly, het sy kosbare kennis opgedoen en geleer om met minder klaar te kom.
Is daar ’n kans dat sy na die stad sal terugkeer? “Nee, ek verruil my omgewing vir niks nie,” sê Antoinette. “Hier sien ek elke aand ’n helder hemelruim vol sterre.”
En wie kan nou daarmee stry?