Hier volg die nuus
Die “eks”-aktrise van Days Of Our Lives (1965-nou; meer op ble. 18-19) Jen Lilley doen haar woord gestand en keer terug na die sepie. Sy is in 2016 weg ná vier jaar as die moeilikheidmaker Theresa Donovan, en het botsende skedules met ander projekte waartoe sy verbind is as rede aangevoer. Sy het onlangs laat glip “dit sal wonderlik wees om storie-oorgange te hê soos Kristen (Eileen Davidson), wat ook onlangs teruggekeer het. Jy sê nooit nee vir Days nie!” Kat Dennings het netwerkprogramme (2 Broke Girls is in Mei vanjaar ná ses jaar gekanselleer) vir stroomdienste verruil. Sy het ’n rol gekry in Hulu se nuwe program Dollface as “’n vrou met ’n gebroke hart wat ou vriendskappe wil hervat wat verlore gegaan het terwyl sy in haar verhouding was”. Die vervaardiger sal Margot Robbie (Harley Quinn in die sci-fi-fliek Suicide Squad, 2016) wees, wat dalk ook ’n rol sal vertolk. Die Ocean’s Eleven- (2001) ster George Clooney keer terug na die kassie byna 20 jaar ná hy dr. Ross in ER (1994-2009) gespeel het tot 1999. Hy sal deel wees van ’n beperkte-reeks-verwerking van Catch-22, die 1961-roman wat tydens WOII afspeel. Dit handel oor ’n Amerikaanse lugmagoffisier en sy kollegas wat hul varkies in die oorlog probeer behou. Dis ook in 1970 in ’n gelyknamige fliek verwerk, met Jon Voight in die rol. Die professionele danseres en spanlid van die realiteitsreeks Dancing With The Stars (2005nou) Julianne Hough het ’n rol gekry as ’n oor-die-muur-musikant in die komende komedie One Hit Wendy. Sy sal ’n eentreffer-musiekwonder speel wat van haar verlore glorie probeer herwin deur ’n mentor vir opkomende talent te wees, en probeer hulle help om haar foute te vermy. Julianne is ook die uitvoerende vervaardiger van die program. Fans van die countrymusiekreeks Nashville (2012-nou) wat gehoop het op ’n nuwe romanse vir Deacon en Alyssa (Charles Eston en Rachel Bilson) gaan teleurgesteld wees. Seisoen 5 het geëindig met die paartjie wat soen, maar Rachel het onthul sy sal nie terug wees vir seisoen 6 nie, want sy sluit by Eddie Cibrian aan vir die komende komedie Take Two. En of dit nie genoeg slegte nuus is nie, sal seisoen 6 die laaste een wees. Die komende Amazon Primereeks van Lord Of The Rings kom nie net teen ’n stywe prys nie (volgens gerugte is dit biljoene), maar dit het ook ’n lang lys bepalings en voorwaardes om “die integriteit van J.R.R. Tolkien se werk te verseker”, sê ’n bron. Na verwagting sal die reeks kyk na Middelaarde se oorsprong, maar alles moet goedgekeur word deur die Tolkien-familietrust, wat die regte besit. Die gewese Grey’s Anatomy- (2005nou) ster Sara Ramirez (Callie) hoop haar nuwe rol as Madam Secretary (2014-nou) se politieke strateeg Kat Sandoval sal meer permanent wees. Sy het net ’n eenjaar-kontrak geteken, maar het ’n hou ingekry na haar eksbase en gesê haar nuwe program “het ’n inklusiewe span en karakters. Dit bevorder komplekse driedimensionele vroue en hul belangrike en invloedryke posisies in die inhoud.” Die detail is nog vaag, maar dit lyk of daar meer Big Little Lies(2017-nou) aksie sal wees ná die HBO-netwerk amptelik die groen lig vir seisoen 2 gegee het, hoewel geen datum of inligting nog bekend is nie.