Drama: Edwin van der Walt (Waterfront)
Edwin speel graag die gawe ou sowel as die baddie.
Waterfront Seisoen 1 Dinsdae kykNET (*144) 20:00 Sara Se Geheim
Seisoen 1 (herhaling) Maandae-Donderdae kykNET (*144) 21:30 (vanaf 11 Desember)
Van ’n bose karakter tot ’n nice ou – Edwin van der Walt (26) deins nie terug vir uiteenlopende rolle nie. Van April tot Junie vanjaar het hy kykers die josie in gemaak as die skynheilige student Gerhard in die kykNET-dramareeks Sara Se Geheim (2017). Tans is hy te sien in nog ’n kykNET-dramareeks, Waterfront, as Stefan Jordaan, die kroonprinskleinseun van die skeepsmagnaat Ben Myburgh (Dawid Minnaar) wie se skielike dood ’n verdeelde familie bymekaarbring.
OUPA SE NALATENSKAP
Edwin, ’n gebore Kapenaar, hou van sy Waterfront-karakter. “Stefan is geesdriftig en baie lief vir sy ouers, Ruan (Stian Bam) en Anna (Rolanda Marais), wat nooit getrou het nie en hul verhouding etlike jare gelede verbreek het. Stefan het ook ’n sensitiewe en emosionele kant wat vyf jaar gelede duideliker geword het toe sy ma ’n groot uitval met sy oupa gehad en Londen toe verhuis het,” vertel Edwin.
Stefan is in ’n sekere sin die seun wat oupa Ben nooit gehad het nie. “Ben wou sy nalatenskap met die bootbouonderneming laat voortleef, maar toe sy witbroodjie- dogter Anna verkas, het Ben al sy hoop op sy kleinseun gevestig,” voeg Edwin by. Al het Stefan sy oupa verafgod, is sy lewe nes die ander karakters s’n omvergegooi toe Ben dood is en donker geheime op die lappe kom. “Stefan voel sy lewe was ’n leuen en hy is wreed ontnugter.”
PA EN SEUN
Edwin is bly hy kan weer Stian (40) se seun speel, soos in die fliek My Father’s War (sien langsaan). “Stefan en Ruan is meer soos goeie vriende as die konvensionele pa en seun. Weg van die stel is ek en Stian self hegte vriende. Hy is ’n mentor en het my goeie riglyne tydens my tonele gegee,” vertel Edwin.
Terug na Sara Se Geheim: Die tweede seisoen wat in April 2018 op kykNET begin, word tans in die Kaap verfilm en Edwin hervat sy rol as die gehate Gerhard. “Ek hou daarvan om die held sowel as die baddie te speel,” sê Edwin. “Die skurkrolle gee jou meer vryheid om iets te ontgin wat ver verwyderd van jouself is.”
HENGEL, KOOK EN LIEFDE
Edwin wou nie altyd toneelspeel nie. Op skool was hy ’n kranige losskakel en heelagter en het vir Paarl Boys High se eerste span uitgedraf. “Ek wou ná matriek ’n professionele rugbyspeler word, maar het toe besluit om drama te gaan swot.” Tydens sy studiejare van 2012 tot 2015 op Stellenbosch het Edwin reeds sy eerste fliekrol in Hollywood In My Huis (2014) gekry en sedertdien het hy die rolle ingeryg. Weg van die kameras is Edwin ’n buitelugmens en hy is mal oor varswaterhengel. “Ek maak ook graag kos en geniet kosprogramme op TV. Glo dit of nie, in my vrye tyd lees ek resepte,” lag hy. En jammer, meisies – daar is deesdae ’n spesiale vrou in die aantreklike akteur se lewe. Sy is Ansu Visser (25), die aanbieder van die kanaal kykNET NOU! se program chatNOU! Edwin en Ansu, wat in Johannesburg woon, het vroeër vanjaar tydens ’n oudisie ontmoet en gaan nou sowat ’n maand uit. “Ansu is awesome! Al woon ek in die Kaap, doen ons moeite om mekaar gereeld te sien,” vertel Edwin. Ons gee nie om om Edwin te deel nie – solank ons hom nog gereeld op TV en in die fliekteater sien.