Verlore vader
Maryke se vervreemde pa, Sakkie, wurm hom weer in haar lewe in.
Getroud Met Rugby Weekdae kykNET (*144) 21:00
Die skoonheidskundige Maryke Beltrame (Marijke van der Westhuizen) en haar rugbyafrigterman, Fafa (Altus Theart), het ’n opwindende Kersfees beleef met die geboorte van hul eersteling. Maar vroeg in die nuwe jaar is haar lewe omvergegooi toe haar vervreemde pa, Sakkie (Pierre van Pletzen), op Maandag 15 Januarie voor haar deur opgedaag het. Maryke wil hom glad nie terughê in haar lewe nie, maar Sakkie is ’n slinkse kalant en voor sy haar oë kan knip, het hy homself weer in sy dogter se lewe ingewurm.
VERGEWE EN VERGETE?
“Sakkie is ’n gerehabiliteerde alkoholis en motorverkoopsman wat sy lewe probeer regruk,” vertel Pierre. Dis hoekom hy na sy dogter uitreik. Maryke is egter nie reg om te vergewe en te vergeet nie, en probeer Sakkie op Woensdag 17 Januarie uit Johannesburg wegkry. Maar die slinkse Sakkie kry dit later die dag reg om met Fafa kennis te maak en Fafa met sy sjarme en slim praatjies te beïndruk.
Fafa probeer Maryke op Donderdag 18 Januarie oorreed om haar pa ’n tweede kans te gee, maar sy wil niks weet nie, sê Marijke. “Sakkie het haar en haar oorlede ma jare gelede weens sy drankverslawing gelos en net verdwyn.” Sakkie probeer op Maandag 22 Januarie weer, maar Maryke beskou sy pleidooie as manipulasie.
BELOWENDE GELEENTHEID
Ná ’n lang gesprek met Fafa op Woensdag 24 Januarie stem Maryke in om saam met haar pa te gaan eet. “Die ete is styf en Maryke voel ongemaklik,” sê Marijke. Maar Sakkie is in ’n goeie luim op Donderdag 25 Januarie en nader Fafa met ’n sakevoorstel wat ’n groot opbrengs belowe, vertel Pierre. Maar hoe geloofwaardig dit is, weet ons nie. “Sakkie het altyd ’n klomp truuks,” sê Pierre. Hy breek dalk net weer die nuwe ma se hart. Of het Sakkie regtig verander?