Geloof en liefde
Pastoor Ronald is Mrs J se kanker-hulp.
Suidooster Ma.-Do. kykNET (*144) 18:30
Ruiterbosch se moederhen Mrs. J (Theresa Sed ras) veg al sedert begin Desember 2017 teen bloedkanker. Die chemoterapie behandeling is veeleisend, maar daar is een man, buiten haar getroue familie, wat haar elke dag die moed en wilskrag gee om aan te hou baklei – pastoor Ronald (Ivan Abrahams), dr. Siya (Gantane Kusch) se oupa wat onlangs by hom kom kuier het. Die man van God help die diep gelowige Mrs. J positief bly in die moeilike tyd, en onverwags ontwikkel hulle gevoelens vir mekaar. En terwyl dit opwindend is, dra dit nie almal se goedkeuring weg nie.
’N TEKEN VAN BO
“Ronald se koms en ondersteuning is vir Mrs. J ’n teken dat haar geloof die enigste standvastigheid in haar lewe is en as sy haar kankerstryd wil wen, moet sy nou meer as tevore glo,” sê Theresa. Mrs. J is skrikkerig en om sin te maak van haar emosies gesels sy op Donderdag 18 Januarie tydens ’n hospitaalkuier met haar beste vriendin Mymoena (Jill Levenberg). “Mymoena sê Mrs. J moet die gevoelens tussen haar en Ronald ’n kans gee. Mrs. J se man, wyle Henry, sou wou hê sy moet gelukkig wees, daarom moet sy die kans wat sy gekry het aangryp,” voeg Theresa by.
WEES GEWAARSKU
Ronald erken op Maandag 22 Januarie aan Siya hy voel ook meer as net vriendskap vir Mrs J. En al is Siya bly vir sy oupa se onthalwe, het hy ’n waarskuwing vir hom, sê Ivan. “Siya sê vir Ronald as hy regtig gevoelens het vir Mrs. J, moet hy besef hy gaan in ’n stadium moet kies tussen sy kerk en verantwoordelikhede in die OosKaap en haar.”
Mrs. J word later dieselfde dag ontslaan nadat haar behandeling voltooi is. “Die dokters is tevrede met haar vordering en hoop sy sal binnekort in volle remissie wees,” vertel Theresa. Maar sodra sy alleen in haar huis is, begin Mrs. J haar gereelde besoeker mis
NOG TEENKANTING
Mymoena moedig Mrs. J op Dinsdag 23 Januarie aan om iets omtrent haar en Ronald te doen. “Mrs. J skraap die moed bymekaar om Ronald te bel en tot haar verbasing nooi hy haar vir tee en koek by Siya se woonstel,” sê Theresa.
Die afspraak verloop goed, maar op Woensdag 24 Januarie is daar hindernisse op hul liefdespaadjie wanneer Mrs. J se twee dogters, Bridgette (Denise Newman) en Lee-Ann (Portia Joel), hul teenkanting uitspreek. “Albei voel Ronald is nie welkom in hul gesin nie en hy sal nooit hul pa se skoene kan vol staan nie.” Die uitlatings ontstel Mrs. J en sy is effens in twee geskeur. “Volg sy haar hart? Of spaar sy haar dogters se gevoelens?” vra Theresa.
TE GOED OM WAAR TE WEES?
Ronald kry op Donderdag 25 Januarie ’n noodoproep van sy kerk wat hom terugroep na die OosKaap. “Skielik tref die werklikheid hom,” sê Ivan. “Sy kuier in Ruiterbosch word kortgeknip en hy gaan Mrs. J in die steek laat.” Mrs. J is verpletter wanneer Ronald haar op Maandag 29 Januarie vertel hy moet vertrek. “Mrs. J sien nie kans vir ’n lang afstand verhouding nie ,” verduidelik Theresa.
Maar dit beteken nie dit is die laaste sien van Ronald nie. Ons het ’n voëltjie hoor fluit die pastoor gaan dalk terugkom. Hopelik is Mrs. J dan al gesond en kan hulle hul liefde vir mekaar geniet sonder enige hindernisse of teenkanting.