Agter tralies
Sabelo en Suffocate word gearresteer omdat hulle ’n ontvoerder vermoor het.
Rhythm City Weekdae e.tv (*194) 19:00
Dit reën nie, dit sous – dis wat die gekwelde weeskind Sabelo (Ishmauel Songo) op Donderdag 18 Januarie uitvind wanneer hy saam met sy oudtronkvoëlpel Suffocate (Mduduzi Mabaso) gearresteer word omdat hulle die kinderontvoerder Skhumbuzo (Mncedisi Thambe) vermoor het. “Om hom te vermoor was nie deel van Sabelo se planne nie,” sê Ishmauel. Sabelo wou Skhumbuzo net karnuffel omdat hy sy broer Dumisani (Siyabonga Mtshali) laat in Desember 2017 gyselaar gehou het. Sabelo het Skhumbuzo ’n hou gegee, hy het sy kop gestamp en is dood. “Sabelo is vreesbevange! Hy was al in die tronk vir mindere oortredings soos huisbraak, en hy het dit gehaat. Maar 25 jaar!” sê Ishmauel. Sabelo sal enigiets doen om in die tronk te oorleef, selfs al moet hy teen sy beste vriend Suffo draai.
VERBREEKTE VRIENDSKAP
Suffocate was nie daar toe Sabelo Skhumbuzo vermoor het nie, nogtans is hy in hegtenis geneem as medepligtige aan moord en omdat hy dit geheim gehou het. Die twee word op Dinsdag 23 Januarie na die gevaarlikste tronk in Joburg geneem, waar “Sabelo dit nie kan verduur nie,” sê Ishmauel. “Hy sukkel om sy situasie met die gevaarlike gevangenes te aanvaar.” Om sake te vererger, besoek Sabelo se niggie Mapula (Mapula Mafole) hom op Donderdag 25 Januarie en sê sy sukkel sonder sy geldelike hulp. “Sabelo probeer voor Mapula maak of hy dapper is, maar binne-in is hy verpletter. Hy verpes dit dat hy nie sy familie kan help nie,” voeg die akteur by.
Suffo sien hoe die tronklewe sy pel raak en maak ’n belofte om hom te help, kom wat wil, en dink nie daaraan dat Sabelo hom in die rug kan steek nie. Die ouens word op Vrydag 26 Januarie deur verskillende bendes genader, en al sluit Sabelo by die 68-bende aan, “weier Suffo om by ’n bendeoorlog betrokke te raak. Hy bly op sy eie. Sabelo dink die bende kan hom beskerm en help om geld by sy familie buite die tronk te kry,” sê Ishmauel. “Suffo het ’n geskiedenis met die 68-bende en hy weet hulle gebruik Sabelo om hom seer te maak,” onthul Ishmauel. Maar die jongeling weet dit nie en wil net sy eie bas red – tot hy weer Suffo se hulp nodig het.