Die Kasteel
Seisoen 1 kykNET (*144) 20:30 Komedie
Pulane Sekepe (26) se vuurdoop in haar eerste komediereeks, as die huishulp Cecilia Dube in Die Kasteel, was aanvanklik senutergend. Maar die regisseurs en haar gesoute medespelers het haar gou tuis laat voel voor die kameras. “Die hele span was baie ondersteunend en ek het elke dag iets nuuts geleer,” vertel sy.
Hoe sal jy Cecilia beskryf? Sy is reguit en seker die verstandigste van die spulletjie in die boetiekhotel. Sy’s ook ’n terggees en nie op haar mond geval nie. Wat was vir jou die grootste uitdaging van die komediereeks? My eerste TV-ondervinding was verlede jaar in die realiteitsreeks Nou Of Nooit, wat met een kamera verfilm is. Met Die Kasteel was dit skrikwekkend om voor ’n paar kameras toneel te speel en al die terminologie op stel het my verwar, maar dit het elke dag beter gegaan. Ek het eers gedink ek gaan nooit al die woorde in my kop kry nie, maar het my dialoog op ’n band opgeneem en dit oor en oor gespeel. Het jy enige toneelopleiding? Glad nie. Ná my matriek aan die Hoërskool Die Wilgers in Pretoria in 2009 het ek vir twee jaar by die organisasie C-kruis aangesluit. C-kruis verkondig die Evangelie deur middel van dans, toneel, musiek en kuns aan jongmense, en bied vertonings op uitnodiging by gemeentes landwyd aan. Ek het gesing, gedans en toneelgespeel. Jy was ook drie jaar by die radiostasie Jacaranda FM? Ek het sedert 2015 verkeersverslae gedoen, maar in Julie verlede jaar bedank om vryskutwerk te doen. Vertel ons meer van jou maatskappy? Ek en Nelis Vosloo, my vennoot, het verlede jaar Salt And Pepper Creative gestig. Ons reël geleenthede en troues en dis vir my lekker om deel te wees van ander mense se spesiale okkasies.