HIER VOLG DIE NUUS
THE BIG BANG THEORY
Die komediereeks The Big Bang Theory (2007-nou) het die pas werklose Beth Behrs (Caroline van 2 Broke Girls, 2011-2017) opgeraap as Nell, die liefdesbelangstelling vir Raj (Kunal Nayyar) in seisoen 11. Maar daar’s ’n probleempie vir die arme nerd: Nell is nog getroud en haar aggressiewe man (gespeel deur Walton Goggins, Russell in Vice Principals, 2016-2017) wil haar terughê.
ALMAL WIL TV TOE
Die skuif van flieksterre na die kassie duur voort, met die jongste een Kate Beckinsale wat by die komende Amazon Primerillerreeks The Widow aansluit. Die aktrise, bekend as die vampier Selene in die Underworld-flieks (2003-nou), speel die nuwe weduwee Georgia Wells, wat nou in afsondering leef. Maar dan sien sy haar veronderstelde oorle’ man springlewendig op TV en vat sy spoor. Georgia se soektog neem haar na die VK, die Kongo en selfs Suid-Afrika, waar die reeks vandeesmand geskiet word.
TRUE DETECTIVE
Die veteraan Stephen Dorff is deur True Detective (2014-nou) ingekatrol as speler in seisoen 3. Die fliekakteur sal die rol vertolk van Roland West, ’n ondersoeker wat die grootste deel van sy loopbaan van 30 jaar daaraan gewy het om ’n misdaad op te los wat met die jare ál geheimsinniger geword het. Soos Kate Beckinsale is Stephen van die fliekvampierwêreld – hy was in die 1998-fliek Blade.
THE OFFICE
Dis dalk te gou om te praat, maar volgens gerugte werk NBC aan ’n nuwe weergawe van die komediereeks The Office vir die 2018/ 2019-seisoen. Dit sal glo weer afspeel in die Dunder Mifflin Scranton-kantoor, met ’n mengelmoes van ou en nuwe spelers. Maar fans van die oorspronklike reeks sal teleurgesteld wees omdat Steve Carell nie terugkeer as die bestuurder Michael Scott nie – blykbaar word n nuwe baas vir die maltrappe gesoek.
THE FIXER / HOW TO GET AWAY WITH MURDER
Olivia Pope (Kerry Washington) verlaat haar gemaksone van die politiek in The Fixer (2008-2018) om ’n draai te maak in ’n ander Shondaland-reeks. Die reeksskepper, Shonda Rhimes, het ’n stukkie van ’n draaiboek uit How To Get Away With Murder (2014-nou) getwiet oor Olivia in gesprek met Annalise Keating ( Viola Davis), met die onderskrif: “Dit gaan gebeur!” Dis die eerste groot Shondalandprogramoorkruising wat nie in splinterreekse is nie.
THE X-FILES
“Ek het genoeg gehad!” – Gillian Anderson het besluit om die scifi-reeks The X-Files (1993-nou) te verlaat ná 11 seisoene as die spesiale FBI-agent Dana Scully. En dis nie ’n leemte wat met ’n nuwe karakter gevul sal word nie. Die reeksskepper, Chris Carter, sê hoewel daar meer stories is om te vertel, “ís The X-Files Mulder (David Duchovny) en Scully. Ek sal dit nie sonder Scully of Mulder doen nie – dis nie my X-Files nie. Hulle moet albei hier wees.”
REEKSE HERNU
• Die realiteitsprogram Swamp People (2010-nou) en sy krokodiljagters leef voort – dis vir ’n 9de seisoen hernu. • Die avonturier Bear Grylls keer terug vir seisoen 5 van sy realiteitsreeks The Island With Bear Grylls (2014-nou). • Archie (KJ Apa) en sy pelle kry meer raaiselagtighede om op te los in die dramareeks Riverdale (2017-nou) ná dit vir seisoen 3 hernu is. • Die gunsteling-TV-nerd Sheldon Cooper is hier om te bly met ’n 2de seisoen van Young Sheldon (2017-nou). • En ABC het stilweg ook The Good Doctor (2017-nou) vir ’n 2de seisoen hernu.