Gesondheidsprobleme en nuwe liefdes
7de Laan Weekdae SABC2 (*192) 18:00 MAART
Justin is bekommerd oor Diederik se gesondheid, Lesedi sit Jacob op sy plek, en Nozi kry nuwe blyplek. Thomas begin vreemd optree wat sy ma, Esti, bekommerd maak. Bonita begin weer haar eie blommebesigheid en kry ’n kontrak by Bruynwaves vir ’n groot funksie sonder Vanessa se medewete. Hilda bak brownies vir die jong mans met wie sy bevriend geraak het om met hul fondsinsameling te help, en Charmaine gaan op ’n welverdiende vakansie saam met haar bikerkêrel,
Mike (James Borthwick). Esti kry ’n oproep van Thomas se skool oor sy swak gedrag, Amorey weier om Willem te vergewe, en daar’s groot fout met Diederik wanneer hy ’n uitval met sy kollegas by Bruynwaves het. Charmaine se duiwelse tweelingsus, Vivian ( Vinette Ebrahim), is terug in Hillside en maak amok. Matrone en Hilda tree vreemd op ná hulle van Hilda se brownies proe, en Alexa is uiteindelik terug uit Afrika en raak van haar preutse houding en stylvolle klerekas ontslae.
APRIL
Justin en Vince kry elk ’n nuwe liefdesbelangstelling. Thomas se boelie,
Jacques (Ruan Wessels), knou hom verder af by die skool. Diederik moet van die gif in sy lyf ontslae raak, en Rickus raak ál swakker. Justin is uiteindelik gereed om sy eksverloofde, Amanda (Carina Nel), te laat gaan en oor te begin met sy nuwe liefie. Vanessa is briesend wanneer sy uitvind haar werknemers het haar om die bos gelei en sy moet nou met iemand saamwerk vir wie sy nie ooghare het nie. Amorey neem haarself kwalik vir die toestand waarin Diederik is, en André en Connie is weer dolverlief. Hilda kan nie glo sy is so bedrieg nie en is bang sy kom in die moeilikheid by die gereg. Xander en Bonita kom nader aan mekaar, Nozi kry ’n nuwe kapsel, en Amorey kry die kans om werkervaring in Oppiekoffie se kombuis op te doen.
MEI
Olivia is bekommerd oor Rickus wat ál sieker word. Justin raak vryerig met sy nuwe meisie, en Marko en Esti se verhouding word getoets wanneer Thomas met iemand na aan Marko koppe stamp. Diederik is op die herstelpad, maar hoe lank gaan dit hou? Vanessa is vir die eerste keer gelukkig sedert haar huweliksbootjie gesink het, en Charmaine probeer die stukke van haar lewe optel. Amorey besluit om haar loopbaanrigting te verander wanneer sy by Marko se restaurant, Stasie Ses, betrokke raak.