Lelike eendjie
Odelle verander van ’n elegante sepiefeeks in ’n vaal tronkbewaarder vir haar nuwe rol.
Die tronkbewaarder Karlien Bekker in Knapsekêrels is ligjare verwyder van die selfversekerde en gesofistikeerde feeks Delia Richter wat die aktrise Odelle de Wet sedert 2012 af en toe in die sepie Binnelanders (2005-nou) speel. “Wanneer ek my kakie-uniform, pet en stewels vir my rol in Knapsekêrels aangetrek het, het ek dadelik in Karlien se karakter ingeklim,” vertel Odelle. “Ek het onaantreklik en vaal gevoel.” En anders as met die duiwelse Delia, kon Odelle haar met ’n paar skadukante van Karlien se komplekse persoonlikheid vereenselwig.
IDENTITEITSKRISIS
Karlien is die spreekwoordelike lelike eendjie en sy worstel nie net met haar identiteit nie, sy het ook ’n swak selfbeeld. “Ek het nie ’n selfbeeld probleem nie, maar vanweë Karlien se soeke na identiteit het ek ook begin vrae vra soos: wie is ek, hoe sien ander my en word ek deur my werk gedefinieer?” vertel Odelle.
Die regisseur, Human Stark, het haar karakter voor die verfilming noukeurig met haar bespreek. “Die skrywer, Paul C. Venter, se dialoog en die subteks beeld duidelik uit wie en wat Karlien is, en haar persoonlikheid word ook deur haar optrede teenoor ander karakters weerspieël.”
Hoewel Karlien soms hardvogtig voorkom, is sy allermins harteloos. “Sy wil graag ander mense help en ons sien dit vroeg reeds wanneer sy vir een van die gevangenes,
Koos (Shimmy Isaacs), in die bresse tree. Sy is ook die weerligafleier in die disfunksionele Bekker-huis wanneer haar alkoholisma,
Joey ( Wilmien Rossouw), en pa, Dirk (André Odendaal), mekaar gereeld in die hare vlieg.” Vir Karlien gaan dit alles oor oorlewing. “En sy maak staat op haar oorlewing sinstinkte,” voeg Odelle by.
Maar Karlien het nie net ’n selfbeeldkrisis nie, haar seksualiteit word ook deur die gevangenes bevraagteken. “Karlien weet sy is nie gay nie. Maar omdat die gevangenes soos Koos haar konstant daarmee konfronteer, begin sy self vrae oor haar seksuele voorkeur en waardes vra. Dit neem haar op ’n reis, maar op die ou end luister sy na haar innerlike stem.”
Die tonele wat in die gevangenis afspeel het vir Odelle werklik gevoel. Die tronktonele is in die ou Fort- gevangenis in Constitution Hill in Braamfontein, Johannesburg, verfilm. Constitution Hill is in 1896 gebou en die Britte het Boereleiers tydens die Anglo-Boereoorlog (1899-1902) hier gevange gehou. “Toe ons die eerste keer in die tronkselle skiet, het ek gewonder watter stories die mure alles sou vertel. Die ou gebou se donker atmosfeer maak alles nog meer outentiek.”
Odelle voeg by dit is interessant hoe Paul die verskillende karakters in Knapsekêrels se lewe met mekaar verweef. “Dit gaan nie net oor Karlien nie, die gevangenes Domkrag (Riana Alfreds) en Koos het ook hul stories.” Karlien het dalk nie so baie aksiebelaaide tonele soos haar medeakteurs soos Armand
Aucamp (Mynie) nie, maar Odelle vertel Karlien se storielyn lewer baie drama op. “Ek het dit geniet om Karlien te speel omdat haar persoonlikheid soveel lae het.”
JOGA EN STUDIES
Sedert sy haar tronk-uniform ná die verfilming van Knapsekêrels opgehang het, is Odelle terug in die noupassende modieuse uitrustings en hoëhakskoene van Delia in Binnelanders. Ons gaan Odelle vanjaar nog gereeld as die geslepe Delia sien, maar andersins wink daar tans nie ’n nuwe TV-rol nie, vertel sy. Tog is sy besig agter die skerms. “Ek gaan vanjaar sielkunde 1 en 2 buitemuurs aan Wits studeer,” sê die aktrise wat ook ’n BA-honneursgraad in drama agter haar naam kan skryf. “As ek klaar sielkunde geswot het, wil ek my honneurs- en daarna my meestersgraad in dramaterapie doen. Ek wil in die toekoms graag dramaterapie doen.” As opgeleide joga-instrukteur beoog sy om fisieke oefeninge by haar dramaterapie in te sluit. Odelle gee gereeld jogaklasse en gaan einde Julie tot einde Augustus ’n kursus in Ashtanga-joga in Bali bywoon. Hopelik wag daar tussen haar studies en joga nog ’n uitsoekrol soos dié van Karlien in die nabye toekoms. Ons hou duim vas!