Swierige Saterdae
Top Billing skud sy glansvere reg en skuif na Saterdagaande.
Die tydskrifprogram Top Billing (1992-nou) skuif van Donderdagaande na Saterdae met die begin van seisoen 28 op Saterdag 17 Februarie. En in die vroeër tydgleuf van 18:00 (dis om 20:30 op Donderdae uitgesaai) kan fans glans-inspirasie kry net voor hulle regmaak vir ’n aandjie uit. “Dis die jaar waarin ons naweke vier en om die meeste van elke oomblik te maak,” sê die medeskepper en vervaardiger Patience Stevens. “Watter beter tyd is daar om die goeie in die lewe te vier as op ’n Saterdagaand, wanneer Top Billing-kykers kans kry om te ontspan?”
AVONTURE EN TROUES
Terwyl hulle die groot skuif in oënskou neem, het die Top Billing-span ook by hul gehoor op sosiale media gaan kers opsteek oor wat hulle graag in die program wil sien. “Die meeste mense kyk al minstens 10 jaar en weet presies wat hulle wil hê: meer avontuur en plaaslike reise, meer tradisionele troues en ook troues met ’n ongewone tema,” sê Patience. “En omdat Saterdae fliekaand op SABC3 is, sal ons inligting gee oor die flieks wat op SABC3 uitgesaai word, asook die nuwes wat in teaters wys.”
MOSAMBIEK EN MODEWEEK
Wat die programinhoud van nou tot Mei betref, sonder Patience die volgende insetsels uit wat kykers “nie moet misloop nie”:
Februarie “Jonathan woon die 68ste Berlynse filmfees by (sy onderhoude sal in Maart uitgesaai word). Top Billing kyk ook na die spoggerigste uitrustings by 2018 se Sun Met-perdewedrendag.”
Maart “Daar is ons Mosambiek-kuier met die atleet Caster Semenya en haar vrou, Violet Raseboya. Ons besoek ’n luukse lodge in die Krugerwildtuin saam met die aktrise Sophie Ndaba (Queen Moroka in Generations, 19942014) en haar nuwe man, Max Lichaba, en ons verken ’n versteekte juweel in die Wes-Kaap met die langafstan datleet Ryan Sandes en sy vrou, Vanessa.”
April “Ons beplan ’n besoek aan Kanada. Die SA Modeweek sal ’n belangrike insetsel wees, en ons sal fokus op die sukses van plaaslike ontwerpers.”
Mei “Daar is die wenners van die luukse vaart, asook ’n eksklusiewe insetsel oor die kulkunstenaar Dynamo, wat SuidAfrika in Mei besoek.”