Sterre in die oë
Sheldon Cooper het ’n ring vir Amy Farrah Fowler.
Dr. Sheldon Cooper (Jim Parsons) van The Big Bang Theory (2007-nou) is verloof . . . amper! Hy wag nog vir ’n antwoord ná hy in Mei 2017 die vrou wat hom verduur, dr. Amy Farrah Fowler (Mayim Bialik), die ja- woord gevra het. En wanneer seisoen 11 begin, gaan Sheldon leer (met ’n bietjie hulp van die regte teoretiese fisikus prof. Stephen Hawking) hy kan nie die middelpunt van enige heelal wees nie, selfs nie Amy s’n nie.
Sheldon sal in werklikheid moet aanvaar hy gaan moontlik nie die wetenskaplike boffin in sy huwelik wees nie. “Wat ons deesdae lees, dui daarop die neurowetenskap is tans ’n opwindende veld. Dit kry baie befondsing. Die fisika staan ’n bietjie stil. Sheldon sal moet gewoond raak aan ’n lewensmaat wat ’n groter wetenskaplike ster as hy is,” sê die nuwe uitvoerende vervaardiger, Steve Holland.
SO BAIE BESLUITE . . .
Maar moenie dink Sheldon gaan Amy vrye teuels met die troue gee nie – o nee, hy moet in beheer wees! Hulle het nog nie eens ’n datum nie (dit gebeur in ep. 9 op 11 April). “In sy opgewondenheid om die troue perfek te maak, vat Sheldon oor en heroorweeg elke besluit. Dus gaan dit gekompliseerd wees om ’n troue saam met hom te beplan,” vertel Steve. “Die beplanning gaan regdeur die seisoen aanhou en dis moontlik ons sal die troue aan die einde sien.” Ons wag in spanning – nes Mayim. “As ons skrywers besluit om ’n troue te doen, sal daar beslis Klingons [van Star Trek] wees, en dalk Stormtrooper-kostuums [uit Star Wars]. Dit sal die vreemdste okkasie wees!”