When Duty Calls
Seisoen 4 SABC2 (*192) 22:00 Leefstyl Die SA Polisiediens het hulp nodig om misdaad te bekamp en die kykers van hul aktualiteitsreeks When Duty Calls (2009-nou) help hulle. Die reeks is eers Police File genoem. Die episodes word aangebied deur ware polisielede – kapt. Ndivhuwo Mulamu van die Valke se spesiale ondersoekeenheid en haar mede-anker, kapt. Kgaogelo Chokoe, van die forensiese afdeling. Ons het kapt. Mulamu uitgevra. Hoe besluit julle op die reeks se inhoud?
Ons het ’n produksiespan wat saam met toegewyde polisiekantore werk, en hulle stel die inhoud saam. Julle is nie “net” aanbieders nie, nè?
Dis reg. Ons bied die reeks aan, maar ons kry die draaiboeke ’n dag voor die opname sodat ons dit kan vertaal en omgangstaalterme kan byvoeg waar nodig. Ons help ook om dit by te werk om dit tersaaklik te hou. Dit is ook nie jul eerste aanbiedingswerk nie.
Nee, maar ek kan jou sê TV is die teenpool van die radio, waar ek by verskillende stasies gewerk het. Die radio-ervaring het met die TV-reeks gehelp, want ons is “meer menslik” en kan die inhoud toeganklik maak vir die gemeenskappe op ’n manier sodat hulle dit aanvaar en verstaan. Wat is jul voorbereidingsroetine?
Ek en kapt. Chokoe is ’n uur voor die opname by die ateljee. Ons gaan vinnig deur die kopie en maak seker ons weet wat elkeen se woorde is. Julle moedig ook kykers aan om misdaad in hul omgewing aan te meld. Het dit gehelp?
Beslis! Wenke danksy die program het ons ’n hoër suksessyfer gegee om misdadigers op te spoor en om hul bedrywighede te keer. Kykers moet nie self kriminele probeer stop nie. Dis die polisie se werk en ons is hier om te dien en te beskerm!