Homeland
Seisoen 7 M-Net (*101) 21:00 Drama
Carrie (Claire Danes) het pres. Elizabeth Keane (Elizabeth Marvel) van ’n sluipmoord gered in die seisoen 6-finaal van Homeland (2011-nou) in April 2017, maar die president se dankbaarheid was van korte duur en sy het 200 lede van die intelligensie-gemeenskap laat arresteer. Wanneer seisoen 7 begin het Carrie haar werk in die Withuis gelos en werk nou teen die Keaneadministrasie vir die vrylating van die 200 agente, insluitend haar mentor Saul Berenson (Mandy Patinkin). Dis ’n interessante wending, deels te danke aan pres. Keane . . . Die sluipmoordpoging het die president laat wegdraai van haar ietwat liberale politiek na ’n onversetlike outoritêre leierskap. “Die president is nie wie Carrie geglo het sy is nie,” verduidelik Claire. “Carrie bly diep agterdogtig teenoor die president. Alles en almal is gespanne. Die onsekerheid bly ’n tema regdeur seisoen 7.” Elizabeth voeg by: “Keane is in die middelpunt van die paranoïese Withuis. Daar is ongetwyfeld onderwerpe en parallelle in Homeland wat ooreenstem met die dinge wat tans in ons samelewing gebeur.”
Die uitvoerende vervaardiger Alex Gansa, wat tyd in Washington DC deurgebring en met intelligensie-spesialiste en joernaliste gepraat het, stem saam. “Ons vertel in ’n mate ’n parallelle storie met wat in die regte wêreld gebeur. Die beleërde Trump-administrasie het sy eie probleme en pyne met die nasionale veiligheidsinstelling en wat hulle ‘the deep state’ noem. In ons reeks is dit feitlik dieselfde situasie. Die veiligheidsinstelling is verbind tot politiek wat lynreg teenoor die administrasie staan. Dis ’n botsing van magte.”