Castle Rock
Seisoen 1 M-Net (*101) 23:10 Sci-fi
Daar is niks gewoons aan die dorpie Castle Rock in die gelyknamige rillerreeks (2018-nou) nie – veral omdat dit vol karakters is uit die skrywer Stephen King se romans en afspeel in sy gunstelingplek Maine – die tuiste van sy ikoniese stories en flieks soos Carrie (1976), Cujo (1983) en The Shawshank Redemption (1994). “Die idee was om te dink aan die mense wat die volharding en lewensmoed het om op so ’n plek te bly waar jy oor en oor geterroriseer word,” verduidelik die reeksskepper Dustin Thomason. Hulle het hulp by Stephen gekry, wat Dustin en die reeks se medeskepper, JJ Abrams, vrye teuels gegee het. “Wanneer die nuwe outjies in my sandput wil speel, is dit pret om te sien wat hulle doen,” sê Stephen.
Die storie is eenvoudig: Die prokureur Henry Deaver (André Holland) keer terug om die saak te ondersoek van ’n jong man, The Kid (Bill Skarsgård, die moordenaarnar Pennywise in Stephen se 2017-gruwelfliek It), wat in ’n hok in ’n leë vleuel van die Shawshank-tronk gevind is. Henry se lewe word versuur deur sy aanneemma, Ruth (Sissy Spacek, Carrie van die fliek Carrie), ’n Alzheimerlyer, en Henry se gewese bestie Molly
Strand (Melanie Lynskey), ’n dwelmslaaf-eiendomsagent met bonatuurlike vermoëns.
Om die raaisel te verdiep is daar ’n selfdood (episode 1), ’n vermiste begraafplaas en ekssheriff
Alan Pangborn (Scott Glenn) wat glo daar is “ware boosheid in die dorp”, verduidelik Scott, wat laas in die apokaliptiese sci-fi-reeks The Leftovers (2014-2017) te sien was.