Rebel met ’n rede
JJ was al ’n verkuller, ’n dwelmsmous en ’n dwelmslaaf – dis hoog tyd hy gebruik sy stoutseunstreke vir ’n goeie doel.
Days Of Our Lives
Weekdae e.tv (*194) 17:15
JJ Deveraux (Casey Moss) was klaar ’n stoutseun toe hy in Junie 2016 in Salem aangekom het ná hy uit die skool geskors is. Kort daarna, in Augustus 2016, is hy gearresteer vir dwelmhandel en diefstal van middels uit die hospitaal. Maar sedert ’n vriendin in Desember 2016 tydens ’n seks- en dwelmorgie met JJ ’n oordosis geneem het, probeer hy op die regte pad bly – met ’n hobbel hier en daar. Die DEA (Drug Enforcement Agency) besef op Vrydag 31 Augustus JJ is, met sy reputasie, die ideale persoon om onder die dekmantel te werk sodat hulle kan vasstel wie besig is om van Salem ’n dwelmnes te maak. JJ weier botweg, maar gelukkig vir die DEA verg dit net jaloesie om JJ aan hul kant te kry . . .
TOT PAIGE SE REDDING Paige
JJ se eksmeisie (True O’Brien) ignoreer op Vrydag 7 September sy waarskuwing dat Kyle (Michael Cardelle), die ou met wie sy flirt, ’n gevaarlike dwelmsmous is. Dit laat JJ besluit om terug te gaan na die DEA op Maandag 10 September, want hy is vasbeslote om Paige uit die skurk se kloue te hou. JJ word die swye opgelê oor wat hy regtig doen, en gou staan hy weer as die stoutseun bekend. Terwyl hy bondgenote verloor, maak JJ ’n gevaarlike vyand van die dwelmgrootbaas Cly
de Weston (James Read). Maar JJ sal enigiets doen om Paige te red van ’n donker wêreld wat hy alte goed ken. “Hy is nie selfvernietigend omdat hy homself of ander mense wil seermaak nie, maar omdat hy vreesloos is,” sê Casey.
CASEY SE JJ-OOMBLIK
Dit lyk soms of Casey te veel soos JJ is! Hierdie episodes is in Julie 2015 in die VSA uitgesaai, en net ’n paar maande later, op Maandag 26 Oktober 2015, is Casey gearresteer toe hy gedreig het om ’n kroegman in Arizona by te dam omdat die man geweier het om hom meer alkohol te gee. Toe die polisie hom weglei, het Casey probeer ontsnap en geskree: “Ek’s Casey Moss! Ek is ’n akteur in Days Of Our Lives!” Casey het in Junie 2016 toegegee: “Dit was ’n wrede ontnugtering vir my. Die beste is om daaruit te leer en nie droog te maak en dit wat jy het, weg te gooi nie.”