Vervlakste diamante
Die bekroonde reeks Vloeksteen is nou op gratis TV te sien.
Vloeksteen Seisoen 1 Dinsdae SABC2 (*192) 19:00 (begin 11 September)
Die skaduwêreld van diepdekkingsagente gryp nog altyd die verbeelding aan. Dit is ’n gevaarlike en senutergende lewe: Die agente kry nie net nuwe identiteite om die diamantsmokkelaars vas te trek nie, maar loop die risiko om deur die misdadigers ontmasker te word. Vloeksteen, ’n bekroonde dramareeks wat in twee dele van 13 episodes elk op kykNET (2011 en 2013) en in Mei vanjaar op kykNET & kie uitgesaai is, is nou op gratis TV te sien en lig die sluier oor die fassinerende lewe en werk.
DIE WARE JAKOB
As jy dink Vloeksteen is sommer wolhaarstories, maak jy ’n fout. Ludwig (Lud) Oberholzer, ’n boer van Ficksburg wat voorheen ’n diepdekkingsagent was, ken die wêreld soos die palm van sy hand en het die saadjie vir die reeks geplant. Lud, na wie een van die hoofkarakters genoem is, het nou saamgewerk met die skrywer Hein Eksteen om sy spannende stories in ’n reeks van 26 episodes te verwerk. Hein was ook medeskrywer van Die Byl, 2016.
Regardt van den Bergh is die regisseur en is in 2013 met ’n erepenning van die Akademie vir Wetenskap en Kuns vir die reeks bekroon. Hy vertel Hein het wonderlike situasies geskep wat die akteurs kon uitleef. “Ons het een episode in vier dae verfilm en ek moes heeltyd gefokus bly, want ons kon nie bekostig om enige foute te maak en tonele oor te verfilm nie,” sê Regardt.
LOERBROERS
Vloeksteen handel oor die alleenlewe van ’n groep hoogs opgeleide diepdekkingsagente, onder wie Ludwig Swart (Neels van Jaarsveld), Sandra Cilliers (Dorette Potgieter) en Zander Loods (Albert Maritz). Hul hanteerder, Spook de Koning (André Jacobs), en sy assistent en mede-hanteerder, Elle Fourie (Erica Wessels), maak ook deel van die storie uit.
Ludwig, oftewel Lud, Sandra en Zander verloor hul identiteit en kry ’n nuwe skynlewe en vals persoonlikheid wat deur die georganiseerde misdaadeenheid vir hulle geskep word.
Terwyl die diepdekkingsagente die onwettige transaksies met die diamantsmokkelaars probeer beklink, word hul optrede verfilm en direk na die beheerkamer van die hanteerders gebeeldsend. Die hanteerders gee die agente dan opdragte om uit te voer. Die kykers word dus soos loerbroers wat in hul huis al die aksie en drama dophou.