Werkende vrou
Om ’n enkelma te wees in die 1970’s in Los Angeles is allesbehalwe spoggerig in American Woman.
American Woman Seisoen 1 Vrydae M-Net (*101) 22:00 (begin 31 Augustus)
Bonnie Nolan verloor alles in die komedie American Woman (2018nou) en is in die duister daaroor, sê Alicia Silverstone (Cher in die 1995komediefliek Clueless). “Bonnie is ’n tuisteskepper in die 1970’s-Los Angeles, waar haar man,
Steve (James Tupper), as ’n eiendomsagent werk en Bonnie hul dogters grootmaak en die lewe van ’n huisvrou lei.” Met werk bedoel Alicia Steve het ’n skelmpie wat hom die middernagtelike olie laat brand wanneer hy tuis behoort te wees by sy gesin.
“Bonnie se wêreld stort in duie in episode 1 en sy moet grootword ná sy uitvind Steve verkul haar en word vir bedrog ondersoek,” onthul Alicia. “Sy word aangesê om werk te kry, en vir die eerste keer as volwassene is sy bang en voel verlore.” Maar om by die werkmag aan te sluit is nie Bonnie se enigste hindernis nie . . .
Om lid van die ryk vroueklub te wees is ’n probleem wanneer jy nie iemand se vrou of ryk is nie. Sonder Steve se geld moet Bonnie die enigste beskikbare werk aanvaar vir iemand wat net die vaardighede van ’n huisvrou het: werk in ’n boetiek waar haar vriendinne haar sal sien.
GEEN SORGE
Toe Bonnie getroud was, het Steve vir alles gesorg. Al die rekenings is betaal – skoolgeld, partytjies en juweliersware . . . sy het haar oor niks bekommer nie. Dis nogal snaaks wanneer Bonnie haar eerste salarisstrokie kry en vra hoekom geld afgetrek is. Dis vir belasting . . .
Bonnie kry te doen met iets wat vir haar meer vreesaanjaend is as die polisie: haar angstige tiener
Becca (Makenna James) wat nie net rebelleer nie, maar ook haar ma kwalik neem omdat haar pa Bonnie verkul en hulle verlaat het.
Selfs Bonnie se twee beste vriendinne voeg drama by haar lewe. Die aspirant-rolverdelingsregisseur Kathleen (Mena Suvari) se sakevennootkêrel is gay en bedrieg haar, en Diana (Jennifer Bartels) se ma is dominerend. Boonop word Diana by haar werk oor die hoof gesien en sy hanteer dit deur rond te slaap.
DIE REGTE HUISVROU
Die reeks is losweg gegrond op die lewe van Kyle Richards van The Real Housewives Of Beverly Hills (2010-nou). “My ma was ’n vrou wat die tyd vooruit was – in die 1970’s was dit nie aanvaarbaar om ’n sterk vrou te wees nie – veral vir ’n vrou wat twee keer geskei is, soos my ma,” sê Kyle, wat ook die uitvoerende vervaardiger is. Kyle is die tante van die realiteitster Paris Hilton (My New BFF, 20082009), en Kyle onthul American Woman het binnegevegte veroorsaak tussen haarself en haar suster Kathy (Paris se ma): “Sy hou nie daarvan dat soveel van ons kinderjare getoon gaan word nie. Ons stry soos tipiese susters – maar dis niks ernstigs nie. Ons sal teen Kersfees weer met mekaar praat.”