Terry-liefde!
Terry Jeffords is ons gunsteling-karakter in Brooklyn Nine-Nine – van sy liefde vir jogurt tot sy sêgoed.
Brooklyn Nine-Nine Seisoen 2 Sondae SABC3 (*193) 18:02 (begin 2 September)
Jake Peralta (Andy Samberg) dink dalk hy’s Brooklyn se beste polisieman, maar die oulikste speurder in Brooklyn Nine-Nine (2013-nou) is ongetwyfeld sers. Terry Jeffords (Terry Crews). “Die beste ding van Terry Jeffords is hy is ek. Terry eet graag jogurt, ek eet graag jogurt. Terry is lief vir sy gesin, ek is lief vir my gesin. Terry hou van sy kollegas, ek hou van my medespelers,” vertel die akteur Terry C. “Ek kan baie oor myself tot uiting laat kom. Ek is ’n nerd. Dis wie ek is. Ek is ’n kunstenaar. Ek sal vir hulle stories vertel, en drie episodes later word dit in die storielyn gebruik. Dis wraggies cool.” Maar sers. Jeffords het byna nie die kollig gesteel nie. “My karakter was veronderstel om vaal en muisstil te wees,” verklap Terry C. “Maar die aand voor ons die loodsepisode sou skiet, kry ek ’n oproep van die vervaardigers en hulle sê: ‘Terry, ons het ’n fout gemaak. Ons wil hê jy moet jouself wees. Jy’s nie meer bedees nie, jy is aggressief!’ Ek was so bly hulle het dit verander. ’n Mens weet nooit wat Terry gaan doen nie, jy weet regtig nie. Hy kan ineenstort en begin huil, of hy kan jou regtig seermaak.” Sers. Jeffords het vele lae, nes sy heerlike mango-jogurtparfait. En daardie lae bestaan uit die dinge wat Terry na aan die hart lê.
TERRY HOU VAN . . . ’n Aangename vakansie
In episode 12 (18 Nov.) sal ons sien hoe Terry is wanneer hy heeltemal ontspan. Terry lê in sy gemaklikste klere op die rusbank en kondig aan: “Hierdie naweek is ek Vakansie Terry. Geen kinders nie. Geen verantwoordelikhede nie. Ek is net ’n ballon wat in die groot blou lug dryf en ek is ongebonde en vry. Vakansie Terry is geen man se baas nie. As my voete in die pantoffels is, ontspan ek. Ek speel Kwazy Cupcakes [fiktiewe aanlyn speletjie wat in die program geskep is] en ek luister na Sheryl Crow. Ek hou my eie partytjie. Ek is voorbereid op enige vakansiesituasie Ek het ’n botteloopmaker, sonskerm, opblaasbare nekkussing . . . ” Beter kan dit nie!