Mary Berry’s Country House Secrets
Seisoen 1 BBC Lifestyle (*174) 21:00 Leefstyl
Die bakkoningin Mary Berry se liefde vir geskiedkundige Britse wonings het gelei tot haar nuwe vierdelige reeks Country House Secrets in 2017, maar vir die 83-jarige Mary gaan alles steeds oor die kombuis. “Ek en my man, Paul, het landgoedere besoek en ek het altyd gewonder wat agter die geslote deure aangaan, wie daar woon, wat in die kombuis gebeur. My nuwe reeks is ’n soort dokkie waarin van die pragtigste wonings in Brittanje getoon word, waarin ek meer uitvind oor die families wat daar woon en die heerlike maaltye wat in die ou kombuise berei word.”
Mary het polio gehad toe sy 13 jaar oud was en was in 1948 drie maande in die hospitaal weens haar toestand, wat gelei het tot ’n krom ruggraat en ’n swakker linkerhand. Tot op die ouderdom van 15 jaar was Mary ’n rabbedoe, maar dit het verander toe sy huishoudkunde as vak begin neem. “Dit het my lewe vir altyd verander. Dit het my my eerste voorsmakie van bak gegee,” sê Mary. “Die eerste koek wat ek gebak het was ’n Victoriaanse sponskoek, wat steeds my gunsteling is.” Sy het minstens 75 kookboeke gepubliseer, maar vroeër vanjaar het haar sakeryk ’n terugslag gekry ná haar reeks slaaisouse aan die mark onttrek is omdat hulle ongelyste bestanddele bevat het. Sy bestuur Mary Berry’s Dressings sedert 1994 saam met haar dogter Annabel. En wat geniet ’n bakster soos Mary graag? “’n Gebakte eier met roosterbrood, en ’n skyf pizza.”