Moets en moenis
Die fliekresensent Chip besluit hy gaan al die wette en reëls in die Bybel streng nakom.
Living Biblically Seisoen 1 Saterdae M-Net (*101) 18:00 (begin 10 November)
Die Amerikaanse joernalis A.J. Jacobs het in 2007 die boek The Year Of Living Biblically geskryf, waarin hy komies sy pogings beskryf om die dikwels teenstrydige gebooie in die Bybel na te kom. Hy het vele vertalings geraadpleeg en ’n jaar lank volgens die wette probeer leef, van sy baard laat groei tot die manier waarop hy veronderstel is om sy vrou te omhels. Jacobs se ongelooflike storie is die uitgangspunt vir die nuwe sitkom Living Biblically (2018), waarin die fliekresensent Chip Curry (Jay R. Ferguson) ’n Bybel koop ná sy boesemvriend sterf en besluit om die reëls nougeset te volg. Sy lydsame swanger vrou,
Leslie (Lindsey Kraft), is geskok – want volgens die sitkomreëls is vroue veronderstel om afkeurend oor dinge te wees. Maar Chip kan dalk ’n openbaring kry . . .
In episode 1 sien Chip hoe een van sy vriende sy vrou verkul. Volgens Levitikus 20:10 moet Chip die egbreker stenig, dus gooi hy ’n klip uit ’n nabygeleë potplant na sy pel voor hy padgee. Maar as Chip verder gelees het, sou hy in Johannes 8:7 sien Jesus waarsku: “Laat die een van julle wat ’n skoon gewete het, eerste ’n klip [op haar] gooi.”
Soms is die teenstrydigheid die gevolg van interpretasie. In episode 6 sukkel Chip om heeltemal op te hou jok volgens Eksodus 20:16: “Jy mag nie vals getuienis teen ’n ander gee nie” – wat nie oor noodleuentjies gaan nie, maar die verpligting om die waarheid in regsake te praat.
Laastens moet Chip aanpas by die klemverskuiwing in die erkenning van basiese menseregte. Hy stel in episode 10 voor Leslie bedank uit haar werk om by die huis te bly en hul baba groot te maak. Maar Efesiërs 5:22 se “Vrouens, wees aan julle mans onderdanig” gaan nie verwelkom word nie. Leslie vra Chip: “Is jy nou in beheer van my?” Oeps! Dit lyk of Chip dan en wan vergeet sy projek moet daaroor gaan om van homself ’n beter mens te maak.