Burn Notice
Seisoen 1 Weekdae e.tv (*194) 09:30 Aksie
’n “Burn notice” is slegte nuus vir ’n geheime agent. Dis ’n boodskap wat sy agentskap aan die intelligensiegemeenskap stuur om hulle te waarsku die spioen het onbetroubaar geword. Dis die ekwivalent van die ontslagbrief: Bates word bevries en jou werkgeskiedenis word uitgewis – moet dus nie ’n maatskappyverwysing verwag nie. En dis rampspoedig vir agent Michael Westen (Jeffrey Donovan), wat weer in sy tuisstad Miami beland en gedwing word om as ’n ongelisensieerde privaat speurder te werk terwyl hy met sy grootste saak besig is – om te probeer vasstel wie hom “verbrand” het in die sewe seisoen lange aksiekomediereeks Burn Notice (2007-2013).
MICHAEL SE SPAN
Michael het steeds sy indrukwekkende spioenvaardighede om op terug te val, insluitend vindingrykheid, vegkuns en behendigheid met wapens, asook ’n verkleurmannetjievermoë om aksente en identiteite aan te neem. Maar dis ’n taai wêreld en Michael het ’n vriend of twee nodig. Al is hy persona non grata in die spioenwêreld, kry Michael ’n nuwe span bymekaar, wat insluit: Sy gevatte witkopma Madeline 1 Westen (Sharon Gless, Cagney in Cagney & Lacey, 1982-1988), wat feitlik sy ondersoekbesigheid bestuur. Sy glansryke eksmeisie Fiona 2 Glenanne (Gabrielle Anwar), ’n oud-IRL-agent wat wapens en plofstof hanteer – fisiek en emosioneel. Hulle het vir ’n goeie rede uitgemaak, maar soms ontgaan dit hulle. En sy ou pel Sam Axe (Bruce 3 Campbell), ’n semi-afgetrede FBIinformant wat altyd “iemand ken wat iemand ken” wat Michael kan help.