Die sluier gelig
Sandra maak nader kennis met onortodokse geloofsgroepe.
Openbarings Seisoen 1 Donderdae VIA (*147) 20:30
Sandra Prinsloo (71) se belangstelling in mense en onderwerpe is aan baie bekend. En met die kykNETreeks Sandra Op ’n Drafstap (2001-2003 & 2014-2015) het die aktrise haar staal as onderhoudvoerder gewys. Met die reeks Openbarings skuif Sandra weer as gesprekvoerder voor die kamera in en gee ons ’n objektiewe kykie na ’n verskeidenheid gelowe en leerstellings wat vir baie van ons onbekend is.
NUWE INSIGTE
Openbarings was ’n openbaring vir haar, bieg Sandra. “Ek het nooit besef daar is so ’n verskeidenheid gelowe nie. Die reeks plaas ook talle Afrikageloofs-kulture, wat baie ekstreem kan raak, in die kollig,” vertel Sandra. “Van die gelowe en hul gebruike is - ver verwyderd van my verwysingsraamwerk. Ek het nie probeer oordeel nie en wou verstaan wat in mense se psige aangaan wanneer hulle byvoorbeeld petrol drink en glo dit gaan in pynappelsap verander.” (episode 6)
BREINSPOELING
Alternatiewe gelowe is om verskillende redes gewild, sê Sandra. “Mense word gereeld van hul menswaardigheid ont- neem en ontwikkel dan ’n behoefte om tot ’n groep te behoort. Of hulle streef daarna om hul eie identiteit binne so ’n groep of kultus te vind. Dit is skokkend hoeveel studente op kampusse ge-‘lovebomb’ word,” vertel sy. (Love bombing is ’n manier om ’n persoon deur middel van aandag en toegeneentheid positief of negatief te beïnvloed.) “Van die geloofsleiers het ’n fyn uitgewerkte strategie of veldtog wat hulle op sosiale vlak toepas – en dit is geensins ’n onskuldige strategie nie. Die slagoffers word as ’t ware gebrein-spoel,” sê Sandra.
Van die groepe of kultusse word dan die begin en einde vir die lede of lidmate. “En die uiteinde is nie so rooskleurig nie – families word baiekeer as gevolg van die alternatiewe groepe opgebreek en spat uitmekaar.”
GEMENE DELER
Sommige van die groepe het ’n paar dinge gemeen, sê sy. “Hulle het meesal ’n charismatiese leier. En dan word vrees ook dikwels by die lede ingeboesem – daar word aan hulle gesê dit en dat gaan met hulle gebeur as hulle nie aan sekere leerstellings glo nie. Die lede is gewoonlik bang om die groep te verlaat,” verduidelik sy. “Die aanbidding van ’n god of opperste wese verskuif ook gereeld na ’n mens wat vereer word.”
OBJEKTIEF
Sandra, wat nie tot ’n kerkverband behoort nie, sê sy is nie in een dogma vasgevang nie. “Persoonlik oordeel ek nie ander gelowe of filosofieë soos die Joodse geloof of Boeddhisme nie. In my lewe probeer ek altyd objektief teenoor ander geloofsoortuigings wees. Maar ek het tog met die verfilming van die reeks ondervind ek het ’n probleem met emosionele manipulering – veral as dit groot skade aan mense en hul verhoudings berokken.”