Groot avontuur
Pasella- aanbieder kyk terug op 19 jaar se belewenisse.
Pasella Seisoen 27 Woensdae SABC2 (*192) 19:30
Paul Rothman (40) is so sinoniem met die leefstylprogram Pasella (1998-nou) as wat braaivleis en mieliepap met Suid-Afrika is. En ná amper twee dekades op die kassie laat die sexy man die skone geslag steeds swymel.
Sy passie vir sy werk as Pasella-aanbieder het sedert sy begindae geensins verflou nie en hy pak elke onderhoud steeds geesdriftig aan. “Ek het in 1999 by die span ingeval omdat ek gedink het dit kan pret wees. Maar dit was baie meer as pret. Pasella het my horisonne verbreed en my die kans gebied om die wêreld en baie mense uit alle vlakke van die samelewing beter te leer ken. Dit was tot dusver ’n ervaringgedrewe avontuur vir my,” sê hy.
Wat was jou hoogtepunte tot dusver
as aanbieder? My vaart in 2010 op ’n Russiese navorsingskip in die Noordpool was onvergeetlik. My onderhoude met die skrywer Johan Bakkes (Openbaring, 2016) en die magnaat Richard Branson, wat albei in 2008 plaasgevind het, staan ook uit. Johan het die kuns vervolmaak om sy professionele en sy avontuurlewe te balanseer. Richard het ’n blywende indruk op my gemaak omdat hy ondanks sy sukses en welvaart so nederig en toeganklik bly. Dan wil ek ook die sanger-liedjieskrywer Jan Blohm (Breyten Se Brief, 2004) uitsonder. Ek het meer as een keer ’n onderhoud met Jan gevoer en die laaste een was in 2013. Jan se eerlikheid en hoe hy met die donker skadu’s soos depressie spartel en dit oorbrug, het my diep geraak.
En laagtepunte? Daar was weinig. Ek dink die insetsels oor glansryke dekorartikels of koek het my nie altyd geboei nie. En af en toe was daar ’n jong, onervare kunstenaar wat nie die nodige substansie aan die onderhoud verleen het nie. Maar ek gaan nie name noem nie. Wat het Pasella al vir jou beteken? Ek was aanvanklik onseker en selfbewus voor die kamera, maar het gou geleer ek moet uit my dop kruip as ek onderhoude voer. Dit het my ook gehelp om van my vrese soos hoogtevrees te oorbrug. Ek moes in verskeie insetsels
abseil, bergklim, rekspring of vryval, maar ek het my later gekondisioneer dat wanneer ek my verbind het om dit te doen, ek nie op die nippertjie kop uittrek nie. Jy balanseer jou TV-aanbieding ook met ander werk? Ja, sedert 2007 is ek regsadviseur – ek lewer regs- en besigheidsverwante dienste vir ’n werkgewersmaatskappy. (Paul het ’n BCom Regte-graad aan die Universiteit van Pretoria verwerf en in 2002 ’n LLB- graad aan dieselfde universiteit.) Ek bied ook gereeld motiveringspraatjies aan vir verskeie kliënte onder die vaandel van WarriorCraft oor die mag van besluitneming en selfverdediging aan. Is daar nog enige ander doelwitte wat jy
vir jouself gestel het? My seun, Wolfe (18 maande), het my geïnspireer om ’n kinderboek, Waya The Warrior Wolf (2017), te skryf en uit te gee, en ek wil nog kinderboeke skryf. Ek wil ook vroeg volgende jaar weer ’n Thaiboksgeveg aandurf. (Hy was in 2001 die Thaiboks-wêreldkampioen in die swaargewig-afdeling). Dan wil ek ook met ’n bewusmakingsprojek begin om vooroordele in die samelewing te help beveg.
Beskou jy jouself as ’n sekssimbool? Ek aanvaar ek is seksueel aantreklik. Ek moedig ook ander aan om dit te doen. Dit was voorheen dalk vir my belangrik om die regte beeld en voorkoms te projekteer, maar ek het baie afgekoel. Dis nou vir my belangriker om na myself te kyk en gesond te leef.
Hoe koördineer jy en jou lewensmaat, die eks-model Candice (Boucher), jul onderskeie verpligtinge en loopbane? Ons woon in Pretoria en Candice staan douvoordag op, want sy werk by ’n kuberveiligheidsmaatskappy in Johannesburg. Ek speel dan gewoonlik soggens ma vir klein Wolfe. Maar ons het ’n goeie ondersteuningstelsel en Wolfe het ook ’n oppasser wat hand bysit.