Moord- masjien
Joubert laat moord in die spioenasieriller Condor soos kuns lyk, maar die aktrise Leem Lubany is glad nie so nie.
Aksiereekse gebruik dikwels ontevrede oorlogsveterane as hul skurke – vol letsels en tatoes en getraumatiseer weens hul weermagdiens. Die nuwe weergawe van Condor (2018-nou, gegrond op die 1974-roman Six Days Of The Condor en die 1975-fliek Three Days Of The Condor) se sluipmoordenaar is die keer ’n vrou, Gabrielle. Die 21-jarige Arabies-Israeliese Leem Lubany vertolk die rol wat in die fliek deur Max von
Sydow beroemd gemaak is. Sy sê: “Gabrielle Joubert is die koudste sluipmoordenaar. Sy loop in, trek die sneller, stap uit. Sy is die persoon na wie die spioenasiewêreld sal gaan om iets gedoen te kry.”
VROUEMAG
Joubert is Leem se vyfde akteurswerk en haar eerste TV-rol, het sy verduidelik, was baie meer veeleisend as
wat sy verwag het. “Jy dink dit sou soos in ’n fliek wees, maar dis soveel meer. Van die rol-lesings tot die vuurwapenopleiding tot die waagtoertjies – dis op ’n heel ander vlak. Die karakter ook. Onverbiddelik, genadeloos, geheimsinnig, gewelddadig.” Die reeksskeppers Todd Katzburg en Jason Smilovic wou ’n vrou hê, maar was verras met Leem se oudisie. “Ons het iemand in haar dertigs gesoek,” verduidelik Todd. “Toe stap die jonger Leem in en oorrompel ons. Sy het die koue Mossad-agent met soveel mag vertolk – sy moes die rol kry.”
MEDESTER
Joubert word gestuur om die CIA-ontleder
Joe (Max Irons) te vermoor, maar die akteurs het baie pret op stel gehad, sê Max: “Ons het vir wapenopleiding gegaan en sy was dadelik intimiderend gemaklik daarmee. Ek het gedink: ‘Sjoe, sy’s so pragtig, maar sy wil my skiet’.” Leem sê: “Ek haat wapens, maar Joubert is mal daaroor, die koue staal teen haar vel, die mag om dood te maak in haar hande. Dit was opwindend.”