Spanmaat-probleme
Die polisiemanne is wild en vry in die aksiereeks Rush Hour.
Seisoen 1 Weekdae e.tv (*194) 20:30 (begin Maandag 3 Desember)
Jackie Chan en Chris Tucker het ideaal by mekaar gepas in die polisiepel-komediereeks in die Rush Hour-flieks (1998nou). Maar toe die 13 episode lange Rush Hour-TVreeks (2016) geskep is, het die skerpskertser Justin Hires by Chris oorgeneem as die LAPD-speurder James Steven Carter, en die Britse akteur Jon Fo het Jackie se rol as die Hongkong-speurder Jonathan Lee oorgeneem. “Nuwe stories, dieselfde karakters, effens jonger, nuwe dinamika,” som die reeks se medeskepper Bill Lawrence dit op – wat ook die mediese komedie Scrubs (2001-2010) geskep het.
FLIEK TEENOOR TELEVISIE
Die eerste episode van die reeks het na aan die storie van die oorspronklike fliek gebly, met ’n speurder van Hong-kong op die spoor van Chinese misdadigers, met ’n onaangename, luidrugtige Los Angeles-speurder as sy spanmaat. Maar hierna gaan speurder Lee ligter en snaakser word. “Ek dink hulle groei om lief te word vir mekaar, want hulle is nie so verskillend nie. Hulle albei gee om vir hul familie. Hulle albei wil tot elke prys doen wat goed en reg is,” voeg Bill by. Die reeks betrek die familie in die openingsepisode omdat speurder Lee die Chinese misdaadsindikaat se moord op sy suster (pleks van sy baas se dogter wat ontvoer is, soos in die fliek) ondersoek. Sy was ook ’n speurder. En Carter kry familie in die vorm van sy glibberige neef Gerald (Page Kennedy), ’n straatwyse geheime polisie-informant.
AKSIE-ONTPLOFFING
Ons kan ook ’n meer atletiese TVweergawe van Carter verwag. “Ek het ’n eerstegraadse swart belt in karate en is ’n natuurlike atleet,” sê Justin. “Ek’s net 5 voet 6 duim (1,67m) lank; om kykers dus te laat glo ek kan slegte ouens aanvat, moet ek wys ek kan gatskop.” En Jon, wat al gevegkuns beoefen vandat hy agt is, sal ook nie terugstaan nie. “Dis van die gekste waagtoertjies en mal dinge wat ek al beleef het, van teen hyskrane ophardloop tot op jagte spring,” sê hy.