Tyd Met Aleit

Seisoen 3 kykNET (*144) 18:00 Leefstyl

Aleit Swanepoel, bekende beplanner van geleenthede, onthale en troues, staan altyd reg met innoverende stylwenke. In seisoen 3 van sy leefstylreeks Tyd Met Aleit voeg Aleit ’n segment oor argitektuur en ontwerp by. Hy en die span het die land platgereis om by bekendes te kuier en om besonderse wonings op kamera vas te vang. Aleit deel sy menings en wenke met ons.

Wat is jou definisie van styl? Vir my is styl ’n spesifieke manier – die regte manier – om iets te doen. Of dit nou aantrek of uiteet of dekor is. Styl kan van persoon tot persoon verskil, want dit word bepaal deur ons herkoms, kultuur en wêreldwye tendense waaraan ons blootgestel word. Wat vir my stylvol is, is nie noodwendig vir jou nie. Maar ek glo ’n mens moet gemaklik voel met dit waaraan jy glo – ook wanneer dit by styl kom. Gee drie wenke vir hoe jy ’n elegante geleentheid met ’n klein begroting kan waarborg? Kies ’n goedkoper proteïen soos hoender pleks van lamsvleis en berei ’n spesiale gereg daarmee. Tweedens kan jy in jou tuin en kaste na bestanddele sowel as besonderse dekorartikels soek. Derdens kan jy jou gaste vra om ’n gereg saam te bring na die ete, soos jou vriendin wie se uithaler-nagereg van verlede Kersfees jy steeds onthou. Hoe het julle die huise vir die nuwe insetsel

gekies? Ons het bekende en gerekende argitekte regoor die land gevra om hul beste werk aan ons voor te lê. Dit was weer eens vir my belangrik om ’n verskeidenheid van huise in te sluit, ’n woning waarmee almal kan identifiseer. Daar’s byvoorbeeld groot tot klein huise, ekovriendelike wonings, bestaande huise wat opgeknap is, historiese reuse en eenmanwoonstelle.