Ete Vir Twee
Seisoen 2 Woensdae VIA (*147) 17:30 Leefstyl Dit is nie kinderspeletjies om Kupido vir goeie vriende te speel nie. Maar as jy gasheer kan speel vir ’n toekomstige paartjie – en die regte ambiance tydens ’n romantiese ete kan skep – blom die liefde dalk net. In die tweede seisoen van Ete Vir Twee kry enkellopendes weer die geleentheid om hul pasmaats deur goeie vriende te ontmoet. Dewet van Rooyen, mede-vervaardiger, vertel meer.
Waarom is afspraak-reekse soos Ete Vir Twee so gewild? Die soeke na liefde is universeel en kykers identifiseer maklik met sulke kykstof. Almal ken daardie opwinding en ongemak van ’n heel eerste ontmoeting en afspraak. Wat maak Ete Vir Twee anders as soortgelyke reekse? Hierdie reeks is gewild omdat dit by die Kupido se huis en onder sy of haar toesig plaasvind. Die meeste standvastige verhoudings vat vlam deur middel van gemeenskaplike kennisse, en dit is presies wat ons met Ete Vir Twee probeer doen. Was daar al enige afsprake wat ’n totale fiasko of mislukking was? Ja, daar was een episode in die vorige seisoen waar die paartjie oor ’n onderwerp begin gesels het waaroor hulle geheel en al verskil. En die res van die aand was baie ongemaklik. En was daar al enige groot suksesverhale?
Ja, daar was reeds ’n paar afsprake waar die paartjies gekliek het en mekaar daarna weer gereeld gesien het. In hierdie seisoen (episode 5) het Kupido se pyltjies reg getref en die twee is nou nog saam. Hulle het sommer die eerste naweek ná hul ontmoeting ’n afspraak vir ’n potjie gholf gemaak.