Wilde-dokters
Seisoen 1 Donderdae VIA (*147) 17:00 Realiteit
Tydens opnames van Diere-dokters (2016-nou) is dié dierereeks se kameravrou Liesl- Carma aan die begin van 2018 gevra om aanbieder van Wildedokters (2018-nou) te wees. “Ek dink dit was my kamoefleerdrag en my groen Jeep wat die ding gedoen het,” grap die voormalige ballet- en flamenkodanseres. “Ek het natuurlik ja gesê, want die natuur lê my na aan die hart.” Sy het jare gelede al haar dansskoene vir die veld verruil en deurkruis nou die land om wildveeartse te besoek en kykers eerstehandse insae te gee in wat hulle presies doen in die reeks van 13- episodes. “Dit is absoluut ongelooflik om te sien wat hulle vermag.”
Jy was ’n danser, so waar kom die belangstelling in die omgewing vandaan? As kind het ons familie baie plase besoek. Ek het my ma se ou kamera “gesteel” en portretstudies van elke dier op die plaas gemaak. Hoekom lê wildbeskerming jou so na aan die hart? Ons het moeder natuur nodig! Sonder plante, diere, insekte, voëls, skoon lug en skoon water kan die mens nie oorleef nie. Alles is interafhanklik. As een element ten gronde gaan, tuimel die hele kaboedel inmekaar. Was daar enige episode wat jou kriewelrig
gemaak het? In episode 4 (20 Desember) moes jagluiperds verskuif word. Terwyl die mediese en bewaringspanne besig was om die verdowings te doen, het een skielik wakker geword. Die ouens moes behoorlik spring om die groot kat in sy hok te kry. Een van die ouens het ’n paar lelike krapmerke opgedoen.
Is jy bang vir enige wilde diere? Moet nooit te gemaklik raak nie, al lyk die diere op die oog af onskadelik en kalm. Menige wildboer is al dood weens ’n “mak” njala- of buffelbul.