Gewaagde stories
7de Laan het kykers laat kopkrap.
Die jaar 2018 was bisar vir 7de Laan (2000-nou). Storielyne van mensehandel, tronkvoëls, geheime gevegsklubs, verneukery en ’n kultusgroep wat ’n gemeenskap gyselaar hou, het kykers goed omgekrap. Negatiewe kommentaar was oral op sosiale media te sien, maar aanhangers het bly inskakel en 7de Laan het sy kyksyfer van 3 miljoen oortref.
DROOMWERK WORD NAGMERRIE
Hillside is op Donderdag 8 Februarie geruk toe drie inwoners Amorey, Olivia en Nozi (Kristen Raath, Nadia Herbst en Dimpho Moore) ontvoer is deur ’n mensehandel-sindikaat. Die drie vriendinne het gedink hulle gaan op die avontuur van ’n leeftyd waar hulle by ’n spogskool in Taiwan sou klas gee, maar dit was ’n slenter. Gelukkig het die manne van Hillside vinnig hul eie speurwerk gedoen en op Dinsdag 13 Februarie die meisies in ’n skeepsvraghouer wat nog in Suid-Afrika was, opgespoor en bevry.
TRONKVOËLS
In April het 7de Laan sy 18de verjaardag gevier en is onthul Hilda (Annelisa Weiland) is die sakevrou Mariaan (Deirdre Wolhuter) se biologiese ma. Die boetiekbestuurder Connie (Quinne Brown Huffman) en prokureur André (Marcus Muller) het hul liefde aan mekaar verklaar, maar die verhouding is steeds wankelrig.
In Junie het ’n groot tronk-storielyn afgespeel met ses karakters agter tralies. Amanda (Carina Nel), Bonita (Hildegardt Whites), Emma (Bertha le Roux), Mariaan, Natalie (Daniella Deysel), en Vivian (Vinette Ebrahim) was almal gevangenes en die lewe in die tronk was allesbehalwe ’n piekniek. Bonita het die swaarste gekry omdat sy onder die indruk was haar babaseuntjie Daniel (Riley Moses) is dood. Sy het al haar varkies verloor en probeer selfmoord pleeg deur ’n matras aan die brand te steek. Tydens die brand het Amanda begin kraam, maar haar babadogter is dood weens rookinaseming.
VERNEUKERY EN ’N GEVEGSKLUB
Willem (Markus Haywood) en Amorey se huwelik het in Augustus op die rotse beland toe Willem Amorey met die jogainstrukteur Tineke (Trix Vivier) verneuk het. Amorey het Hillside op Donderdag 23 Augustus verlaat en Stellenbosch toe getrek. In September het Rickus (André Lotter), Amorey se broer, ’n moeilike tyd beleef – hy het aan impotensie gely en by ’n gevegsklub Leef Of Lei aangesluit. As die suksesvolle vegter Ratel het hy sy manlikheid herwin, maar dinge het te ver gegaan tydens Ratel se geveg teen Arend (Marcus Muller), en hy is vir dood gelos.
HILLSIDE DIE NUWE HAVEN
Die lede van die Haven-groep het Rickus op Vrydag 21 September by ’n afgeleë rivier buite Hillside gekry ná sy geveg teen Arend. Die groep se hoof, oom Francois (Chris van Niekerk), wat jare gelede in Hillside gewoon het, het Rickus versorg en hom begin breinspoel om sy groep se mantra te volg om Moeder Aarde te beskerm en tegnologievry te leef. Op Vrydag 18 Oktober het ons die sakeman Chris Welman (David Rees), Rickus se pa, gegroet toe hy België toe gevlieg het om by sy tweede gesin, wat hy jare lank weggesteek het, te wees. En op Maandag 29 Oktober infiltreer Francois en sy kultusgroep Hillside en hou inwoners gyselaar.
WENSLYS VIR 2019
Ons wil goedvoelstories sien in 2019. Gee vir ons Vince en Aggie (Jacques Blignaut en Mimi Mahlasela) se troue, bring vir Chris Welman terug en laat hom en Mariaan versoen raak. En vir ’n bietjie drama, bring die boetiek-eienaar Felicity (Melanie du Bois) terug met haar kind – Willem se kind wat sy glo in 2016 tydens die swangerskap verloor het.