Op die spel
Verslawing, kanselkaskenades en karakters wat groet.
Die rugbymanne is in 2018 op en van die veld af platgetrek. Van die karakters het gegroet, daar was dwelmskandale, ’n kankerdiagnose en ’n gyselvoorval.
VERVREEMDE PA KEER TERUG
Die lewe van Maryke (Maryke van der Westhuizen), die Stryders se hulpafrigter Fafa Beltrame (Altus Theart) se vrou, het in Januarie onherroeplik verander toe haar vervreemde en alkoholispa, Sakkie (Pierre van Pletzen), voor haar deur opgedaag het. Maryke het al lankal haar pa afgeskryf en wou niks met hom te doen hê nie, maar mettertyd het haar hart versag en hulle het ’n band gevorm.
Op Woensdag 14 Februarie het die paartjie Reitz (Sean van Noordwyk) en die voormalige pompon-danser wat ’n sangeres geword het, Sasha (Anlia van Rensburg), se paadjies geskei. Sasha was vas oortuig daarvan Reitz se eerste liefde, Anna (Kate Roothman), het met haar aankoms (in November 2017) in Johannesburg ’n wig tussen hulle ingedryf. Reitz wou haar nie glo nie, en toe die geleentheid oor Sasha se pad kom om haar sangloopbaan in Kaapstad voort te sit het sy dit aangegryp en op Vrydag 6 April weggetrek.
In Maart is nog ’n verhouding verbreek toe die Stryderskaptein Blitz ( Werner Coetser) se meisie, die hoofpompon- danser Silvia (Nastassja Pretorius), hom gelos het vir haar fotografie-mentor Lynette (Diani Gernandt). Blitz het vernederd gevoel en sy kollegas het dit ook nie vir hom maklik gemaak toe hulle sy manlikheid bevraagteken het nie.
’N GRUSAME HUISINBRAAK
In Mei was daar twee skokgebeurtenisse. Eers was die Stryders se sielkundige Iva (Nadia Beukes) in ’n ernstige motorongeluk waarin sy ’n nekbesering opgedoen het. Die pyn was ondraaglik en Iva het kort voor lank ’n pynpilverslaafde geraak. Op Donderdag 24 Mei het sy na ’n rehabilitasiesentrum gegaan, maar het teen Julie weer verslaaf geraak aan die pille, haar tasse op Woensdag 18 Julie gepak en verdwyn.
In Mei het die trane gevloei toe die Stryders se assistentafrigter Ike (Fezile Mpela) op Vrydag 25 Mei gesterf het tydens ’n gyselvoorval by die stadion. Arme Bibi (Stephanie Baartman), Ike se vrou, het gesukkel om sy dood te verwerk.
Reitz verklaar sy ewige liefde aan Anna op Vrydag 24 Augustus, minute voor sy kansel toe sou stap om met haar verloofde, Daniël (Stefan Vermaak), te trou. Reitz het besef hy kon nie meer sy gevoelens vir sy eerste liefde onderdruk nie, en Anna het ook besef sy het Reitz nog altyd lief. Hulle het in ’n kar gespring en weggejaag op die dag van die troue – hul ouers was smoorkwaad!
GRUSAME HUISINBRAAK
Borskanker is op Vrydag 19 Oktober by Nina Bekker (Jocelyn Broderick), Reitz se ma, gediagnoseer. Op Vrydag 2 November het Nina ’n dubbele mastektomie en rekonstruksieoperasie ondergaan, teen einde November het haar herstelproses goed gevorder en sy is in remissie verklaar.
In Desember het die Nina en haar man Gideon (David Vlok), ’n terugslag beleef toe hulle slagoffers van ’n grusame huisinbraak was. Die paartjie was so getraumatiseerd dat hulle besluit het om terug te trek na hul tuisstad, Bloemfontein. Die Strydersgemeenskap het gesukkel om van hulle afskeid te neem, en op Vrydag 21 Desember het Gideon ’n teer oomblik met sy seun Reitz gedeel voor hulle finaal gegroet het.
WENSLYSIE VIR 2019
Ons dink dis tyd dat die bose karakters Gerald en Laetitia (David Clatworthy en Franci Swanepoel) terugkeer en die kwaadstokers Bart en Kristien Smit (Pierre Breytenbach en Marlee van der Merwe) op hul plek sit. En as daar nog ’n karakter is wat ons graag sal wil sien terugkom is dit Iva. Sy moet haar man, Schalk (Johan Scholtz), om vergifnis vra en hulle moet versoen raak.