Met die maan gepla
Eksentrieke karakters sorg vir boeiende intriges.
Elke dorpie het ’n aantal eienaardige inwoners en die klein fiktiewe dorpie Maanhaarsdrif in die NoordKaroo is geen uitsondering nie. Maar daar’s meer aan die dorpie as sonderlinge, geheimsinnige karakters – die inwoners het ’n inherente fiksasie met sterrekyk en die sterrewag buite die dorp het die afgelope jare die hoofbron van inkomste geword. Boonop skuil daar geraamtes in elkeen se kas wat mettertyd te voorskyn kom. En een ding is seker – die stilte in Maanhaarsdrif kan nie vertrou word nie.
GROOT INSPIRASIE
Dwaalster kom uit die pen van Nicola Hanekom (Sanel, Sara Se Geheim, 2017 & 2018), die bekroonde regisseur, aktrise, vervaardiger en dramaturg. “Die saadjie vir Dwaalster is 15 jaar gelede geplant toe ek in die Hoeko-vallei by Ladismith in die Kaap was,” vertel Nicola. “Magiese stories is so deel van die omgewing en ek het toe gedink dit kan ’n aangrypende tema vir ’n reeks wees.”
Nicola het besluit om ’n fiktiewe dorpie as die basis vir die storie te gebruik. “’n Denkbeeldige dorpie gee jou net meer vryheid, want enigiets kan daar gebeur,” sê sy.
Dwaalster is nie op ’n spesifieke Karoo-dorp verfilm nie, maar op verskeie dorpe in die Wes-Kaap met baie elemente van die Karoo.
SKRYFPROSES EN TEMAS
Wanneer Nicola karakters skep, delf sy in haar eie siel en gebruik hier en daar karaktertrekke van mense wat sy ken. “Kom ons sê dis die waarheid, maar ek lieg so ’n bietjie by,” vertel sy. Die een karakter, Bliksem (Carel Nel), is byvoorbeeld gegrond op ’n ou wat in die Hel in Gamkaskloof in die Karoo woon.
Sy skryf karakters makliker wanneer sy ’n spesifieke akteur wat die karakter moontlik kan vertolk, in haar kop het. “Toe ek die karakter Frans geskryf het, was Albert Maritz in my gedagtes en gelukkig was hy beskikbaar vir die verfilming,” vertel sy.
Soms leen sy ook van haar vorige karakters wat sy vir die verhoog geskryf het, bieg sy. “Die dowe kelnerin Gina, wat deur Tarryn Wyngaard gespeel word, het ek op ’n dowe karakter in my verhoogproduksie Betésda (2009) gegrond.” Volgens Nicola is dit sover sy weet die eerste vir plaaslike TV – ’n dowe karakter wat liplees en in gebaretaal praat.
Nicola voeg by Dwaalster is ’n besonderse reeks wat nog nie op eie bodem vervaardig is nie. “Dit is magiese realisme, verweef met komiese oomblikke sowel as intense drama. Dwaalster beeld ook verskeie onderliggende temas uit wat wissel van integrasie, liefde oor die kleurgrens heen, homoseksualiteit asook kontroversiële kwessies soos hidrobreking in die Karoo.”