War Of The Worlds
Seisoen 1 M-Net (*101) 22:00 Sci-fi
Soek skuiling! Die aliens is op pad in die driedelige 2018-minireeks War Of The Worlds. Dis ’n hervertelling van die gelyknamige HG Wells-roman van 1897 – die een wat in 1938 as ’n radiohoorspel uitgesaai is en so realisties was luisteraars was oortuig daarvan die wêreld word inderdaad ingeneem. Die reeksbaas Peter Harness verduidelik al was die 2005-fliek hedendaags het hy 1900 se Brittanje verkies, want: “Ek wou dit getrou maak aan die toon en die gees van die boek, maar ook verrassend en vol skokke: ’n botsing van sci-fi, periodedrama en gruwel”.
Die reeks handel oor George (Rafe Spall, Eli in die sci-fi-fliek Jurassic World: Fallen Kingdom, 2018) en Amy (Eleanor Tomlinson, Demelza in die periodedrama Poldark, 2015-nou). Hulle vlug vir meer as net aliens: hul familie en vriende het hul samesyn afgekeur want George het sy gesin vir haar verlaat. “Hulle tart die samelewing deur ’n nuwe lewe te probeer begin,” verduidelik Rafe. “In die tyd was egskeiding onaanvaarbaar en nou is dinge erger – monsters van ’n ander wêreld wil alle mense vernietig om die planeet te koloniseer.” Die ander spelers is Ro
bert Carlyle (Repelsteeltjie in die fantasiereeks Once Upon A Time, 2011-2018) as die sterrekundige Ogilvy, wat die aliens se aantog volg; Rupert Graves (Lestrade in die dramareeks Sherlock, 2010-2017) as George se ouer broer Frederick, en Greg Kinnear (Bill in seisoen 6 van die dramareeks House Of Cards (2013-2018) in ’n onaangekondigde rol.