Jay Leno’s Garage
Seisoen 1 SABC3 (*193) 20:30 Realiteit
Jay Leno is bekend om sy ken, sy werk as aanbieder van The Tonight Show van 1992 tot 2014 en sy liefde vir motors. Nadat hy die kletsprogram verlaat het, het hy laasgenoemde twee gekombineer en vorendag gekom met Jay Leno’s Garage (2015-nou). “Ek word betaal om te doen waarvoor ek lief is, bestuur! Dis lekker om op TV te wees, maar motorTV is nóg beter,” sê Jay met ’n glimlag.
Van 2006 tot 2014, was die reeks ’n stokperdjie wat Jay aanlyn gedoen het – ’n webreeks wat aan sommige van sy 300 persoonlike motors toegewy is. Jay het in 2014 ingestem om ’n spesiale episode vir die besigheidskanaal CNBC te maak wat kyksyfers met meer as ’n miljoen laat opskiet het, “wat ongehoord is vir TV. Ons moes ’n TVreeks kry gegrond op die syfers alleen,” sê die 68-jarige Jay. Die Big Dog Garage in die reeks is Jay se werklike garage waar hy meer as die helfte van sy versameling bewaar, wat meer as $50 miljoen (R700 miljoen) werd is. Dis in Los Angeles en hoewel dit nie vir die publiek oop is nie, kan jy ’n private toer bespreek. Jay woon in New York maar vlieg na Los Angles vir ’n maand om elke seisoen te verfilm. Hy plaas ’n derde van sy motors in bewaring sodat die filmspanne beweegruimte in sy garage het. Die reeks word geheel digitaal geskiet en hulle gebruik 20 GoProaksiekameras op die motors wanneer hulle tydens verfilming in LA rondry. Jay Leno’s Garage het in 2016 die Primetime Emmy for Outstanding Special Class Short-Format Non-fiction gewen – dit is Jay se gunsteling-TV-prys. Die aanbieder se versekering verdubbel tydens verfilming al bestuur Jay al langer as 50 jaar.