Net die beste!
Daar is 2019 redes hoekom Showmax vanjaar op jou moethê-lysie moet wees.
2019 beloof romanse, drama, aksie, opwinding en hope avontuur. Dis ’n verkiesingsjaar en ons stem vir meer TV op ons eie voorwaardes – wat ons wil sien, wanneer ons dit wil kyk en soveel moontlik episodes en flieks om te vraatkyk as wat ons moontlik kan. Die stroomdiens Showmax wen dus ons kruisie en sy eerste kwartaal is propvol eksklusiewe plaaslike produksies, reekse wat vir die eerste keer te sien is en episodes om te kyk direk nadat dit op TV uitgesaai is. Hier is van die hoogtepunte om jou kyklus aan te wakker.
SHOWMAX EKSKLUSIEF
Die reeks Sally4Ever (2018-nou) uit die pen van die Britse draaiboekskepper Julia Davis (sy het ook Camping, 2016, gemaak) spog met sterre soos Julian Barratt (Howard in The Mighty Boosh, 2003-2007) en Mark Gatiss (Mycroft in Sherlock, 2010-nou).
Dis ’n komedie oor verskriklike mense wat kykers meesleur in die ontsettende teenspoed in die lewe van die kantoorslaaf Sally (Catherine Shepherd). Sy is verloof aan haar langtermynkêrel David (Alex Macqueen), ’n vaal, bleskop-mannetjie. Maar dan raak Sally halsoorkop verlief op Emma (Julia Davis), wat alles verwoes waarmee sy in aanraking kom. Dis kranksinnig en laat die kollig val op liggaamlike glipsies wat gewoonlik verdoesel word.
Kyk dit saam met ’n vriend wat die gruwelike gebeure met jou kan deel en saam kan ril oor wat julle sien. En moenie vergeet om te lag nie – dit gebeur darem nie met jou nie!