A Million Little Things
Seisoen 1 M-Net (*101) 21:00 Drama
Selfs al het hy ’n B- graad in besigheid en finansies, sou David Giuntoli nooit die korporatiewe wêreld betree nie. Sy karakter in die dramareeks A Million Little Things (2018-nou) werk ook nie in ’n kantoor nie – David speel die musiekonderwyser Eddie, wat hy sê is byna so mal oor musiek as oor toneelspeel.
1 David kom oorspronklik van die sportmal Milwaukee, Wisconsin, maar het nooit sport beoefen nie: “Ek was lomp. Ek het ’n groot kop en om op die basketbalbaan rond te hol sou nie werk nie,” sê hy.
2 Die 38-jarige het in graad 10 uitgeskiet en het sedertdien 1,8 meter lank geword.
3 Hy beweer hy het nooit MTV gekyk nie, maar sy eerste toneelspelwerk was op dié kanaal – hy het in 2003 ’n rol gekry in die realiteitsreeks Road Rules (1995-2007) en het saam met vyf vreemdelinge in ’n ontspanningsvoertuig gebly terwyl hulle ’n reeks uitdagings regoor die staat moes uitvoer.
4 David is die beste bekend as speurder Nick Burkhardt in die donker fantasiereeks Grimm (2011-2017). Hy’t so baie van die rol gehou, hy het ná die verfilming sy karakter se kar gekoop.
5 Hy is doof in sy linkeroor, maar het nooit onthul hoe dit gebeur het nie. Die enigste ding wat hy sal sê is “dit maak die sitplekke by restaurante ’n nagmerrie, want die mense word so geplaas dat ek gesprekke kan hoor”.
6 David se enigste huweliksprobleem met sy swanger aktrisevrou Bitsie Tulloch (Eve in Grimm) is sy “het die vreemdste koshunkerings, maar ons het alles in ons twee spense”. Hulle verdeel hul tyd tussen LA en Oregon.