GAME OF THRONES
Terwyl fans die dae aftel tot die finale seisoen 8 van die fantasiereeks Game Of Thrones (2011– nou) begin, het die produksienetwerk HBO ons ’n voorsmakie gegee van wat in die voorfliekreeks te wagte kan wees deur van die spelers bekend te maak – en daar is meer vroue as wat verwag is. SJ Clarkson (regisseur van die tronkdrama Orange Is The New Black, 2013nou) sal die reeks, wat al in 2020 uitgesaai kan word, regisseer en sy sal bygestaan word deur die oorhoofse vervaardiger Jane Goldman (2011-sci-fliek X-Men: First Class) wanneer hulle episode 1 later vanjaar skiet.
Soos reeds berig vertolk Naomi Watts die hoofrol en die rolverdeling sluit in Jamie Campbell Bower (Caius in die fantasie-franchise Twilight, 2008-2012), Sheila Atim (Limehouse Nell in die periodedrama Harlots, 2017-nou), Georgie Henley (Lucy in die Narnia-flieks, 2005-2010), Alex Sharp (Enn in die 2017-sci-fi-komediefliek How To Talk To Girls At Parties) en Toby Regbo (Aethelred in die historiese drama The Last Kingdom, 2017– nou). George RR Martin, skrywer van die boeke waarop Game Of Thrones en hierdie reeks gegrond is, skerts dat hy dit The Long Night (soos die boeke) wil noem, maar “dit sal help as ek dit eers klaar geskryf kry”.