Wantroue tussen geliefdes
Diederik se huwelik wankel ná sy kankerdiagnose.
Diederik (Hennie Jacobs) het nie lank op die wolke geloop ná sy troue met Olivia (Nadia Herbst) nie. Kanker is onlangs by hom gediagnoseer en die nuus het hom byna soos handomkeer verander. En dit lyk of krake reeds besig is om te begin wys in sy haastige huwelik.
TOEKOMSPROBLEME
“Dit lyk na breinkanker,” sê Hennie oor sy karakter se diagnose. Diederik weet hoe siek dit jou kan maak, want sy neef Marko (Francois Lensley) het in 2016 ook breinkanker gehad en toe vreeslike hallusinasies gekry wat byna sy lewe verwoes het.
Olivia doen haar bes om haar man te ondersteun, maar sukkel om positief te bly. “Sy besef sy lewensgehalte gaan dalk nie altyd wees soos dit was terwyl hy gesond was nie en probleme om met ’n gesin te begin, kan in die toekoms vir hulle opduik,” sê Nadia.
MOENIE MOED OPGEE NIE
Alexa (Carina Nel), Diedie se dokter en vriendin, sien hoe sy siekte sy huwelik beïnvloed en probeer Olivia oorreed om nie moed op te gee nie. “Alexa sê vir Olivia Diederik kan met die regte behandeling en ondersteuning genees word,” sê Nadia.
Olivia se eks-kêrel Rickus (André Lotter) probeer Olivia ondersteun en gee vir haar ’n drukkie, maar wanneer Diedie die “omhelsing” sien, maak hy die verkeerde afleiding. Hy is dadelik agterdogtig en oorweeg dit om weer dwelms te gebruik om van sy seer en moeilike situasie te vergeet.
WEES GEDULDIG
Dinge is gespanne tussen die pasgetroudes en Matrone (Annelize van der Ryst-Hattingh), Olivia se baas by die boekwinkel, onderbreek een van hul argumente. Olivia vra later raad by Matrone, want sy het immers eerstehandse ervaring van kanker: Sy het in 2015 borskanker oorwin. “Matrone verduidelik vir Olivia mense met kanker wil nie ’n las wees nie, en as sy wil hê Diederik moet oopmaak moet sy geduldig wees.”
GAAN DIT WERK?
Olivia neem Matrone se raad ter harte en haar verhouding met Diedie verbeter geleidelik, maar kort voor lank is daar weer ’n terugslag – en dis darem baie gevra van ’n paartjie wat pas trou aan mekaar beloof het . . .