Oorgemaak en opgeknap
Daar is hope franchise-vernuwings om op Showmax te stroom.
Voel jy steeds vasgevang deur die inperking? Raak ontslae van die Covid- depressie deur ouskool vermaak met ’n moderne vernuwing te herleef. Hier is ’n paar flieks en reekse wat splinternuut is danksy hul oormaaksessie, nou op Showmax beskikbaar.
OCEANS 8
Dié fliek van 2018 is ’n opgeknapte weergawe van die oorgemaakte Ocean’s 11-fliek van 1960 met Frank Sinatra, Sammy Davis jr. en Dean Martin. George Clooney, Brad Pitt en Don Cheadle het in 2001 oorgeneem met Ocean’s Eleven. In dié jongste weergawe, waarin net vroue speel, vertolk Sandra Bullock die suster van George Clooney se karakter, Danny Ocean. Sy het ’n dodelike span met Cate Blanchett, Anne Hathaway, Rihanna en Mindy Kaling wat ’n juweliersrooftog beplan wat Danny trots sal maak.
JURASSIC WORLD
Die oorspronklike Jurassic Park-flieks van die 1990’s – ook op Showmax te sien – is in 2010 afgestof. Allen en Ellie (Sam Neil en Laura Dern) is weg, maar Ian Malcolm (Jeff Goldblum) word teruggesleep, tesame met Chris Pratt en Bryce Dallas-Howard, die nuwe helde. Maar mense word steeds geëet en die dinosourusse maak weer amok. Hulle is dié keer net baie meer realisties en skrikaanjaend danksy rekenaargeskepte verbeterings en Ingen (die bio-ingenieurswesemaatskappy) se drang om prehistoriese roofdiere te muteer.
BUMBLEBEE
Hierdie fliek is ’n opknapping van die hoogs suksesvolle Transformers-franchise (2007-nou, Showmax het almal op sy skedule). Onthou julle nog vir Bumblebee, die geel Chevy Camaro van die eerste fliek? Dié weergawe gaan terug na 1987, tot voor Bee Sam Witwicky (Shia LaBeouf) gevind het en teen Megatron baklei het vir die AllSpark. Bee is ’n klein, geroeste VW-kewer, en hy vind aansluiting by ’n jong vrou wat by ’n skrootwerf werk terwyl hulle hul plek hier op Aarde probeer bepaal.
21 JUMP STREET
Die ikoniese polisieprogram van die 1980’s, 21 Jump Street (met Johnny Depp), het in 2010 ’n komedie-oormaaksessie gekry met Jonah Hill en Channing Tatum as die onpaar polisiemaats Schmidt en Jenko. Daar is ook ’n tweede fliek (22 Jump Street, ook op Showmax). In albei soek hulle na dwelmhandelaars. Dit sluit ook kameerolle van die oorspronklike spelers in.
KING KONG
Dié fliek is in 2005 oorgemaak en geskoei op die 1933-fliek oor die reuse-aap wat Manhattan terroriseer nadat hy van Skull Island verwyder is. Dis ’n slim draaiboek met sterre soos Jack Black, Naomi Watts en Adrien Brody wat in tyd teruggaan na 1933. Weens ’n reeks ongelukke, beland hulle op Skull Island, waar Kong ’n band vorm met Naomi se karakter voor hulle hulle op die Empire State-gebou bevind.
MISSION: IMPOSSIBLE FALLOUT
Dié fliek is ’n oorgemaakte weergawe vir TV met Tom Cruise en sy span wat die 1966-reeks vernuwe wanneer agent Hunt (Tom) opdrag kry om gesteelde plutonium te koop. Dis die sesde fliek in die oormaak-franchise, maar dis oukei as jy nie die voriges gesien het nie – dié fliek is losstaande. En agent Hunt het genoeg speelgoed om die ruimteorganisasie Nasa jaloers te maak.