Jy ’tgeen idee nie!
By tvplus kyk ons ongelooflik baie televisie. En al hou ons dalk nie van alles nie, doen ons ons bes om elke program ’n regverdige kans te gee. Maar dis nie als werk nie. Ons raak diep verknog aan reekse.
Stroomdienste laat ons toe om na hartelus te kettingkyk, en ons gunsteling-programme in te pas by al die regstreekse TV-kykery wat ons professioneel doen. Ons kan agteroor sit met ’n lekker opfrissertjie nadat ons intense dramas en rillers oor donker temas gekyk het. En soms kan ons afskakel en net ’n oomblik geniet wanneer ons kniediep in seisoen 4 van ’n reeks vol kinkels is met 40 verskillende sleutelkarakters.
Hier is waarna tvplus kyk vir pret (benewens al die wonderlike Afrikaanse inhoud op kykNET en VIA) . . .
Naam: Genevieve Terblanche
Pos: Senior skrywer op soek na assosieerbare inhoud.
Hou van: Sci-fi waarin ongewone verskynsels karakters regstreeks beïnvloed en hul besluite en gedrag bepaal. Hou nie van: Kletsreekse waarin ’n paneel “vriende” hul menings debatteer deur mekaar dood te praat nie. (Snap, Ipeleng!)
Ek kyk nou: The Iliza Shlesinger Sketch Show (2020) seisoen 1 op Netflix.
My mening oor die reeks: Elke televisie-genre word in dié sketse so briljant geskep en verskerp, van die beligting en kleredrag tot musiekwenke en die styl van aanbieding, dat dit onmiddellik herkenbaar is. Nie almal is treffend nie, maar ek het dié wat nie my lagspiere geprikkel het nie, net oorgeslaan.
My gunsteling-oomblik: In episode 5 is vriende gaande oor “trefferreekse” op TV, maar erken kykers moet deur ’n paar swak episodes worstel, want nie alles is só goed nie. Hulle erken dan later een van die reekse was eintlik aaklig, behalwe die laaste episode. Elke episode is ’n uur en 45 minute lank en daar is 18 episodes in elk van die 6 seisoene tot dusver. Dit is nietemin ’n móétkyk . . . hou net aan kyk. My terneergedrukte siel is op daardie oomblik verlig. Geniaal. Hoekom kyk ek dit nou? Ek het oor komende programme geskryf en die oomblik toe ek besef die sketse is parodieë op TV-reekse, was ek verlore!
Naam: Lucia Poolman
Position: Redakteur wat tydens inperking grys geword het.
Hou van: Meesal van enigiets. Maar as ’n loodsepisode my nie aangryp nie, soos wat nou met Stephen King se Outsider (2020) gebeur het, verloor die reeks my (en ek wou so graag daarvan hou).
Hou nie van: Two & A Half Men (2003-2015) nie, selfs voordat Charlie Sheen weg is. Miskien is ek te preuts.
Ek kyk nou: Liar (2017-nou) op DStv Catch Up.
My mening oor die reeks: Dis verskriklik om te dink wanneer jy beweer jy is verkrag, soos Laura (Joanne Froggatt), en daar is nie genoeg bewyse nie, is dit jou woord teen syne – in in hierdie geval die dokter Andrew (Ioan Gruffudd). Aanvanklik wonder jy wie die regte leuenaar is namate die storie in tydlynspronge ontvou. Dis skrikwekkend, boeiend en laat jou anders kyk na slagoffers van mishandeling. Soos Laura later in die reeks sê: “Jy ken niemand ooit regtig nie.” Voeg daarby familiedrama en ’n polisie-ondersoek wat ’n kinkel kry, en jy het ’n móétkyk-reeks.
My gunsteling-oomblik: Ek kan nie sê sonder om iets te verklap nie, maar dis in episode 1 op ’n pier. Wees gewaarsku: Almal in die reeks het hul eie geheime.
Hoekom kyk ek dit nou? Ek het gesien seisoen 2 is uitgereik en ek het nooit seisoen 1 gekyk nie. Dankie, DStv Catch Up.
Naam: Elri Boucher
Pos: Joernalis wat versot op TV is en dankbaar is sy het ’n werk!
Hou van: Fantasie, sport, musiek- en dokumentêre programme en donker humor met ’n kinkel. En jy kan nie ’n fout maak met ’n bietjie aksie nie, soos 9-1-1 (2018-nou).
Hou nie van: The Simpsons (1989-nou) of Family Guy (1999-nou) nie. Ek verstaan nie altyd die humor in hierdie animasiereekse nie.
Ek kyk nou: The Good Wife (2009-2016) op Showmax.
My mening oor die reeks: Hierdie regsdrama is vol verrassings met die vrou, ma en prokureur Alicia Florrick (Julianna Margulies) as die middelpunt daarvan. Alicia se wêreld word omgekeer nadat haar man, Peter (Chris North), die staatsprokureur van Illinois, in seks met prostitute betrap word. Maar sy ruk haarself reg en kry werk as ’n prokureur by ’n vooraanstaande firma in Chicago waar sy die een saak ná die ander wen.
My gunsteling-oomblik: Dis toe Alicia uiteindelik toegee aan haar gevoelens vir haar baas en ou vriend, Will Gardner (Josh Charles), aan die einde van seisoen 2. Hoekom kyk ek dit
nou? Ek het Gilmore Girls (2000-2007) gekyk en die akteur Matt Czuchry, wat Logan Huntzberger speel, opgemerk. Hy het so bekend gelyk en toe onthou ek hy was Cary Argos in The Good Wife.
Ek het dit jare gelede gekyk en besluit om dit weer te kyk.
Naam: Ipeleng Rakgantsho Pos: Skrywer wat genoeg gehad het daardie TikTok-video’s. Niks meer nie, asseblief.
Hou van: ’n Kort minireeks met ’n duidelike storielyn en ’n goeie klankbaan. Hou nie van: Kletsprogramme in die dag, aangebied deur celebs om ’n ronde tafel nie. Ek hou van elkeen op sy eie, maar saam praat hulle mekaar altyd dood. Ek kyk nou: Little Fires Everywhere (2020) seisoen 1 op DStv Catch Up.
My mening oor die reeks: Die reeks, wat gegrond is op die gelyknamige 2017-roman deur Celeste Ng en in die 1990’s afspeel, het die rassespanning, moederskap en klasverskil tussen twee superma’s vol gebreke – Mia (Kerry Washington) en Elana (Reese Witherspoon) – goed blootgelê. Die boek kry dit reg om ons die wêreld deur Mia en Elena se oë te wys, hul lewens- en loopbaankeuses. Maar die reeks is die beste.
My gunsteling-oomblik: Toe Elena Mia se verraad besef, wat tot ’n groot rusie gelei het. Hierdie vroue hou niks terug nie. Ek was al die pad #spanMia. Iemand moes Elena daaraan herinner dat sy bevoorreg is en ’n obskure wêreldbeskouing het. Hoekom kyk ek dit nou? Ek het goeie resensies oor die reeks gehoor, maar nie tyd gehad om dit te kyk nie. Ek was bly toe ek tydens inperking op DStv Catch Up daarop afkom. Naam: Craig Falck Pos: Adjunkredakteur in TVland.
Hou van: Kerkers en drake, oorgemaakte aksiereekse, soos MacGyver (2016-nou), en TVsjef Gordon Ramsay wat mense “idiotiese toebroodjies” noem. Hou nie van: ’n Inperkingstemming nie – jammer, Survivor (2000-nou).
Ek kyk nou: Absurd Planet, seisoen 1 (2020) op Netflix.
My mening oor die reeks: Absoluut geniaal. Afi Ekulona (verpleegster Janet Lim in Grey’s Anatomy, 2005-nou) is die stem van Moeder Natuur. Sy praat oor diere (wat elkeen sy eie stem en persoonlikheid het, soos Buddy Sparkle die sterneusmol) en dit lyk asof Mamma Natuur sommige van die goed wat gebeur, self nie kan glo nie – soos die vis wat in die seekomkommer se agterstewe leef. “Wat doen jy daar agter, kleintjie?” vra sy. Absurd Planet is opvoedkundig en jy sal goed leer – soos dat die sterneusmol ’n gesplete persoonlikheid en meer as 25 000 sintuiglike reseptore in sy snoet het.
My gunsteling-oomblik: Die verteller boots die legende van natuur-dokkies, sir David Attenborough, se stem perfek na, en die speelgoed-dinosourusse met “grom-grom”-byskrifte. Hoekom kyk ek dit nou? Ek het na die kletsrymer Snoop Dogg se Plizzanet Earth-vertelling oor die natuur op YouTube gekyk – daar was ’n “probeer dit-”skakel vir Absurd Planet. Ná tien sekondes van die lokprent het ek episode 1 op Netflix gekyk.
Naam: Kashief Achmat
Pos: Skeduleerder wat nie sy laaste KFC-maaltyd gewaardeer het soos hy moes nie.
Hou van: Britse komedie. Al is daar net ses episodes per seisoen – dit beteken net jy kry humor van gehalte in elke episode.
Hou nie van: Dansflieks nie. Die storielyn is altyd dieselfde: ’n Arm straatdanser raak verlief op iemand by ’n vooraanstaande dansskool. Gaan hulle, of gaan hulle nie aan die einde saamkom nie? (Bederfbrokkie, hulle doen). Ek kyk nou: Die Britse reeks Peep Show (2003-2015), seisoen 5 op Netflix.
My mening oor die reeks: Dis ’n diaboliese verleentheidsfees wat opgedis word as ’n komedie oor die 30-plus woonstelmaats Jeremy (Robert Webb) en
Mark (David Mitchell) in Londen. Alles word deur hul oë verfilm en jy hoor al hul aaklige gedagtes. Alles, van hul smalende aanmerkings oor hul wense dat hul medewerkers misluk, tot hul twyfel oor hulleself in die slaapkamer. ’n Vertoning van briljantheid.
My gunsteling-oomblik: Episode 5 van seisoen 4 waarin die ouens twee meisies en hul hond na ’n boot nooi. Soos die dronk nag vorder, maak Jeremy per ongeluk die hond dood en alles gaan van erg na erger.
Hoekom kyk ek dit nou? Dit het in my aanbevelings opgeduik en met nege seisoene is dit ’n goeie reeks vir kettingkyk tydens inperking.
Naam: Tumi Kunene
Pos: Senior ontwerper wat die herset-knoppie moet druk.
Hou van: Komedie, drama, aksie en mediese realiteitsreekse!
Hou nie van: Volwasse, geanimeerde 3D-reekse soos The Boondocks nie. Skiet my!
Ek kyk nou: My Feet Are Killing Me (2020), seisoen 1 op TLC (*135) Saterdae om 21:00.
My mening oor die reeks: Dit is dalk walglik, maar ek hou daarvan om te sien hoe dr. Brad Schaffer en dr. Ebonie Vincent alles doen vir hul pasiënte se voete, en hoe regtig slegte voete herstel word. Dit wil my laat braak, maar vir die dokters is dit nog ’n werkdag. Om na hierdie reeks te kyk, het my net weer laat besef ons moet mediese hulp kry voor dinge handuit ruk.
My gunsteling-oomblik: Dr. Schaffer wat ’n man help wat sy voete vir jare afgeskeep het nadat sy ma oorlede is. Sy naels was omgekrul soos bergskaaphorings, sy tone was eintlik aan mekaar vas weens swamme, sy vel was vlokkerig en groot liddorings het op sy voetsole gegroei. Dit het aansteeklik gelyk en moes soos ’n riool geruik het. Walglik, maar wonderlik.
Hoekom kyk ek dit nou? Dit veroorsaak op een of ander manier iets genotvols binne my, net soos Dr Pimple Popper (2018-nou). Die dae is verby dat jy na ’n nuwe liefde se ken, glimlag, spiere en al daai goed kyk. Nou is dit: “Trek hou skoene uit, ek wil iets
sien.”