Ambisie voor lojaliteit
Annelize en Rian konkel om beheer oor Thusanang te kry.
Annelize (Cindy Swanepoel) se ambisie vir mag en status het nóg 'n keer die oorhand gekry. Daarom is sy weer kop in een mus met haar man, At (Hans Strydom), se grootste vyand, Rian (Erik Holm). “Annelize en Rian konkel om beheer oor Thusanang – die Binneland-kliniek se susterhospitaal – te kry en At só sy eienaarskap te kos. Dus saboteer hulle die mediese voorraad wat na Thusanang gestuur word en vervang dit met voorraad van 'n swak gehalte wat op die swart mark verkry is,” sê Cindy. Maar wat hulle nie kon voorspel nie, is dat dié voorraad 'n meningitis-uitbreking veroorsaak!
ONHAFHANKLIKHEID
At en Annelize se verhouding is onkonvensioneel en liefdeloos, daarom het Annelize nie enige lojaliteit teenoor hom nie. “Hul huwelik is slegs 'n saketransaksie en as Annelize op een of ander manier mag en onafhanklikheid in haar werkslewe sonder At se hulp kan kry, gaan sy dit aangryp,” sê Cindy Rian bied Annelize die kans om 'n bestuurspos te kry in sy droominrigting, waarin hy Thusanang wil omskep. “Rian sien Thusanang as die perfekte plek vir sy inrigting waar navorsing oor spinale beserings gedoen sal word. Nou moet hy dit net uit At se hande kry,” sê Erik.
MELK DIE SITUASIE
Annelize is bitter ongelukkig wanneer sy uitvind meningitis het in Thusanang uitgebreek en die swak gehalte van die voorraad is die oorsaak.
“Sy konfronteer Rian daaroor en wil gou al hul spore uitvee, maar Rian weier en sê hulle kan die situasie melk en so vinniger beheer oor Thusanang neem,” sê Cindy. Thusanang word spoedig in die media swart geverf weens die uitbreking en Binneland beland ook in die spervuur weens sy verbintenis met die hospitaal. At is briesend oor die slegte publisiteit en word gedwing om sy susterskind, dr. Quinton (Ramey Short), die administrateur van Thusanang, te skors.
BAKLEI TERUG
“Quinton meen sy skorsing is onregverdig,” sê Ramey. “Hy besef hy is verantwoordelik vir die gemors, want dit het onder sy neus gebeur, maar nou kan hy nie amptelik ondersoek instel en die saak regstel nie. Dit is ook vir Quinton persoonlik 'n laagtepunt, want hy meen hy het almal om hom teleurgestel.”
Gefrustreerd oor die stand van sake besluit Quinton om terug te baklei en begin teorieë met sy kollegas bespreek oor die oorsprong van die uitbreking. “Annelize raak senuweeagtig wanneer sy hoor Quinton vermoed dit het iets met die afleweringsdiens van die voorraad te doen en dat hy dit gaan ondersoek,” sê Cindy. Quinton probeer die bestuurder kontak wat die voorraad aflewer om antwoorde te kry, maar voor hy so ver kan kom, steek Annelize en Rian 'n stokkie daarvoor.
MEDEDINGER MENG IN
At is smoorkwaad wanneer hy uitvind die Southern Hope-hospitaal, Binneland se grootse mededinger met Rian as raadslid, is gereed om die bestuur by Thusanang oor te neem. “Rian het At presies waar hy hom wil hê,” sê Erik. “As Southern Hope seggenskap oor Thusanang kan kry, kan Rian dit mettertyd syne maak en só sy droominstituut oopmaak.”
GAAN DIE WAARHEID UITKOM?
Quinton probeer weer die afleweraar kontak, maar voor hy dit kan doen, keer sy paramedikus-pel Danny (Bradley Olivier) hom. “Danny weet hoe impulsief Quinton kan wees,” sê Ramey. “Die bestuurder kan gevaarlik wees en Quintin wil hom sommer alleen gaan sien. Danny vrees Quinton doen iets wat hy later gaan berou.”
Maar so maklik gaan Quinton nie opgee nie. Kort daarna reël hy dat die bestuurder weer iets by Thusanang aflewer en dié keer wag hy hom in. Maar voor Quinton met hom kan praat, ruk dinge hand uit en Quinton se lewe is in gevaar! Kan dit weer Rian se handewerk wees? Of dalk was dit Annelize wat die waarheid wil toesmeer.