Killing Eve
Seisoen 1 FOX (*125) 20:45 Aksie
Sandra Oh sal vir altyd onthou word vir haar rol as dr. Cristina Yang in Grey’s Anatomy (2005-nou). Dis ’n feit. Maar aanhangers van aksiereekse sal haar van nou af onthou vir haar effens minder ortodokse rol – die verveelde MI5-agent Eve Polastri in die spioenasiereeks Killing Eve (2018-nou). “Daardie vier jaar (tussen Grey’s en Eve), was ’n ware wagtyd. Ek het nie gewerk nie. Ek het probeer uitvind wat dit is om ‘nee’ te sê en wat dit is om ‘ja’ te sê,” vertel Sandra. “Toe Killing Eve opduik, het ek gedink dis die regte ding vir my. Dit voel reg om ‘ja’ te sê.”
Die 48-jarige aktrise het nooit gedink sy sal ’n spioen speel en jag maak op ’n psigotiese sluipmoordenaar soos Villanelle (Jodie Comer, Kate Parks in die mediese drama Dr Foster, 2015-2017) nie, en sê: “Dit was vreemd om die draaiboek te lees en nie te weet hoekom die vervaardigers my vir hierdie karakter wil hê nie.”
Die reeks is gegrond op Luke Jennings se reeks romans met die titel Codename Villanelle (2014-2016) en is geskep deur Phoebe Waller
Bridge (Fleabag in die komediereeks Fleabag, 2016nou), en ná ’n gesprek met
Phoebe, was als vir Sandra duidelik.
“My agent het my gesmeek om die rol te aanvaar. Ek het reeds besluit dit is ’n goeie plan, maar as akteur is dit altyd lekker om te weet die vervaardiger en reeksbestuurder wil net vir jou in die rol hê,” verduidelik Sandra.
Die rol verskaf groot pret aan haar terwyl sy vertroud raak met die spioenwêreld. “Ons delf diep in die verhouding tussen Eve en Villanelle,” sê die aktrise. “Daar’s baie misterie en ek dink ek en Jodie het die vertroue om aan hierdie karakters lewe te gee.”